SANTIAGO DE COMPOSTELA 3 Feb. (EUROPA PRESS) -

Unha tese do Instituto de Investigacións Mariñas (CSIC), que comparou a eficacia das técnicas tradicionais --observación por microscopio-- e da detección biolóxica molecular (PCR) no diagnóstico de enfermidades en moluscos galegos, destacou a capacidade da PCR para "dar resposta rápida á patoloxía nos seus primeiros estados" e "mesmo por persoal sen alta cualificación".

Nun comunicado, o CSIC explicou que os resultados deste estudio, realizado polo investigador Pablo Balseiro, concluíron en que este tipo de probas "se"poderá aplicar á actividade acuícola, que outras --citoloxía ou histoloxía-- non permiten" e, ademais, "permitirá controlar grandes lotes de moluscos" e "detectar un maior número dos infectados".

Precisamente, sinalou que a citoloxía --estudio das células-- "non debe empregarse nos diagnósticos oficiais" dos moluscos "pola súa baixa sensibilidade"; mentres que a histoloxía --estudio da estrutura microscópica dos tecidos-- "presenta unha maior especificidade na detección de Bonamia e Perkinsus" --patoloxías infecciosas--.

Neste sentido, o traballo, que se defendeu no Instituto de Acuicultura da USC con cualificación de sobresaínte cum laude, critica a "lentitude no diagnóstico", o "alto custo" e a "baixa flexibilidade" dos métodos tradicionais "que están recomendados pola Oficina Internacional de Epizootidas (OIE)", o organismo que se encarga de deseñar a política de control das distintas enfermidades animais.

Segundo os datos de 2006 de FAO Fishstat, España é a quinta produtora de moluscos no mundo --0,25 millóns de toneladas-- e Galicia representa "o 96,35 por cento da produción total do Estado".

A actividade na comunidade galega está ameazada por tres enfermidades "principais" que afectan a moluscos bivalvos, das que dous --a Bonamiosis e a Marteiliosis-- son incurables; e a terceira --Perkinsosis--, que se introduciu en Galicia pola importación de ameixa xaponesa, "afecta multitude de especies diferentes".

Entre os moluscos "sensibles a este grupo de patoloxías" atópanse a ostra plana, o mexillón e a orella de mar, que foi cultivado experimentalmente na Comunidade Autónoma.