VIGO, 25 Jun. (EUROPA PRESS) -

O Claustro da Universidade de Vigo aprobou hoxe o seu documento de política I+D+I que, entre outros obxectivos, aspira a configurar un total de 100 grupos de investigación con financiamento estable.

O vicerrector de Investigación, Manuel Reigosa, expuxo hoxe o citado documento, aprobado con 35 votos a favor, 42 abstencións e 3 votos en contra, e afirmou que servirá para "ter ben definido un camiño preferente" para a institución académica, así como un "horizonte proveitoso" na I+D+I a longo prazo.

Así, o documento fixa unha serie de medidas entre as que se atopa unha dotación presupostaria destinada a propiciar que os grupos de investigación sexan "máis competitivos" en convocatorias de Ministerio de Educación e de Xunta. Por iso, defende aglutinar a grande cantidade de colectivos que hai na actualidade ata alcanzar o nivel de 100 grupos con financiamento estable, de forma que poidan aspirar a convocatorias de niveis máis elevados.

Ademais, o documento formula, en forma de incentivo e como premio aos que concorren ás convocatorias máis esixentes, un aumento do recoñecemento en Plan de Organización Docente (POD), dende os 6 aos 9 créditos, para os grupos de investigadores. Tamén se asignará un crédito por sexenio de investigación.

CAPTACIÓN.

Para mellorar a incorporación de novos investigadores proponse a creación dun 'paquete de benvida' cunha dotación de 30.000 euros repartidos, en dous anos, por investigador captado, aínda que tamén se avoga por medidas para a promoción do mérito investigador, mantendo alicientes máis alá do segundo sexenio de investigación.

Finalmente, tamén se inclúen iniciativas para o fomento de unidades asociadas e centros mixtos, infraestruturas e a modificación da oferta de doutorado baseándose nos programas de mención de calidade do Ministerio de Educación.

SITUACIÓN "ACEPTABLE".

Segundo explicou Reigosa, a situación actual da Universidade de Vigo é "aceptable" no que respecta a produción científica e transferencia, cun 15 posto no ranking español de publicacións. Ademais, a institución é a décima a nivel nacional en número de patentes solicitadas, creou 6 empresas de base tecnolóxica e manexa cifras como 6,5 millóns de euros anuais por contratación.

En todo caso, engadiu que "os datos permiten apreciar algúns aspectos, sobre todo de carácter cualitativo, nos que se deberán facer esforzos de mellora no futuro".

CITEXVI.

Pola súa banda, o grupo opositor Nova Universidade recoñeceu aspectos positivos na iniciativa presentada hoxe como o esforzo en políticas de bolsas ou o recoñecemento, para os efectos académicos, da actividade investigadora, ou a aposta polas novas infraestruturas.

Non obstante, denunciou "carencias" no documento e criticou o papel que xoga a Cidade Tecnolóxica de Vigo (Citexvi), ao considerar que se dá "a unha sociedade anónima parte da responsabilidade na xestión da I+D+I da Universidade".

Fronte a estas críticas, o reitor, Alberto Gago, asegurou que Citexvi ten o obxectivo de crear espazos de I+D+i compartidos entre a Universidade e as institucións, permitindo "situar á Universidade no centro da política de I+D+I do seu ámbito por primeira vez".