O Goberno galego financiará os decodificadores que o concello repartirá a cada familia a partir do 10 de marzo

A FONSAGRADA (LUGO), 20 (EUROPA PRESS)

A Secretaría Xeral de Comunicación destina 305.000 euros para o plan piloto de implantación da Televisión Dixital Terrestre (TDT) no municipio de A Fonsagrada (Lugo), que será o primeiro de Galicia no que se levará a cabo o apagamento analóxico o 5 de abril, con dous anos de adianto con respecto aos plans estatais.

Así, nunha rolda de prensa celebrada hoxe nesta localidade luguesa, o director xeral de Comunicación Audiovisual, Manuel José Fernández, e o alcalde do municipio, Argelio Fernández Queipo, explicaron que o apagamento analóxico definitivo producirase en abril e que o Goberno autonómico financiará os decodificadores que o concello entregará ás familias, "un para cada unha".

Neste senso, segundo explicou Manuel José Fernández, A Fonsagrada será o primeiro concello de todo o Estado en implantar esta iniciativa, polo que servirá de "referencia" para as demais localidades do país, e recordou que a proposta supón un "desafío" tecnolóxico e loxístico "enorme", porque é o de maior extensión de Galicia e ten unha orografía e unha situación "complexa". "Se o facemos aquí, podemos facelo noutros sitios", sentenciou.

Pola súa banda, o alcalde lembrou aos cidadáns que "teñan paciencia", posto que se trata dunha tecnoloxía nova na que aínda se está a traballar para que todos teñan o "mellor" servizo posible. Ademais agradeceu á Xunta o interese por implantar este plan de transición á tecnoloxía dixital nunha localidade "tan complexa e esquecida".

Así mesmo, Manuel José Fernández explicou que a Xunta financiará os decodificadores que o concello repartirá a partir do 10 de marzo a todas as familias de A Fonsagrada, que corresponden coa última fase do proxecto de implantación. Precisamente, informou de que o día do apagamento analóxico contarán na localidade coa presenza do presidente da Xunta, Emilio Pérez Touriño, e do Secretario Xeral de Comunicación, Fernando Salgado.

FASES.

As dúas primeiras fases de implantación do proxecto foron levadas a cabo en outubro e decembro de 2007, nas que se informou a poboación da campaña e se alcanzou unha cobertura do 76 por cento.

Na actualidade, estase a levar a cabo a fase tres do proxecto con actividades de intensificación da comunicación cos veciños, así como o apagado de estacións secundarias e a complementación da cobertura ata un 96 por cento.

Ademais, un dos incentivos desta fase é a campaña de comunicación que ten por nome 'O futuro chámase TDT', que conta coa colaboración de Antonio Fraguas, Forges, con diferentes debuxos que se incorporan nos folletos informativos que se repartirán entre a poboación.

Por último, a fase catro do proxecto levarase a cabo en marzo e consistirá na comunicación porta a porta cos veciños, e con no cesamento definitivo das emisións nas estacións principais.