O catedrático da USC José Rivas dirixe o centro, que acollerá inicialmente a 200 científicos de todo o mundo

BRAGA (PORTUGAL), 17 (Da enviada especial de Europa Press Paula Justo Salgado)

O presidente do Goberno, José Luis Rodríguez Zapatero, enmarcou o Laboratorio Ibérico Internacional de nanotecnoloxía (INL) inaugurado hoxe en Braga (Portugal) na "orientación estratéxica" de España e de Portugal de intentar renovar os seus modelos produtivos para superar a actual crise económica.

Na súa intervención durante o acto de inauguración, no que participaron tamén A Súa Maxestade o Rei don Juan Carlos; o presidente da República portuguesa, Anibal Cavaco Silva; e o primeiro ministro do país luso, José Sócrates; Zapatero destacou a posta en marcha deste laboratorio, como unha mostra da "lealdade profunda e fraterna" entre ambos os dous países, nun momento en que "a investigación, o coñecemento e as tecnoloxías constitúen elementos imprescindibles de progreso".

A ese respecto, o xefe do Executivo español referiuse aos retos de carácter global, como a loita contra o cambio climático ou contra a marxinación, e os retos nacionais, entre os que destacou a necesidade de "renovar os modelos produtivos", co fin de que as economías española e portuguesa sexan "máis competitivas e sostibles, apoiadas na innovación e o coñecemento".

Zapatero recordou que España e Portugal destacaron historicamente por no campo dos descubrimentos xeográficos, e subliñou que o INL permitirá a ambos os dous países "debuxar o atlas do futuro" nunha das áreas de coñecemento "máis fascinantes e con maior impacto no futuro", como é a nanotecnoloxía.

COOPERACIÓN HISPANO-LUSA

Pola súa banda, o primeiro ministro de Portugal, José Sócrates afirmou, no seu discurso, que este centro "necesitará do apoio dos gobernos" e garantiu que contará co da Administración portuguesa. Así mesmo, incidiu en que a súa posta en marcha supón un "marco histórico" nas relacións hispano-lusas.

Sócrates, que subliñou a "excelencia" da actividade científica en ambos os dous países, así como o "impulso decisivo" na cooperación internacional, recordou que a función do Laboratorio Ibérico Internacional de nanotecnoloxía de Braga é "servir a dous pobos e ao espírito científico".

O presidente da República, Anibal Cavaco Silva, recalcou a importancia da creación de "redes transfronteirizas de coñecemento", e apuntou que o INL permitirá España e Portugal "posicionarse estratexicamente na vangarda dun dos sectores de investigación punteiros a nivel mundial". Na súa opinión, esta colaboración pode proporcionar, non só capacidade no ámbito das nanociencias e nanotecnoloxía, senón tamén "un maior desenvolvemento da sociedade en xeral e da comunidade empresarial en particular".

LABORATORIO DE NANOTECNOLOXÍA

O Laboratorio Ibérico Internacional de nanotecnoloxía de Braga naceu a raíz dun acordo ratificado en 2005 por España e Portugal, e é o primeiro do mundo que conta cun réxime xurídico internacional e con dous países como membros --agora son España e Portugal, pero calquera Estado pode incorporarse--.

Este centro está dirixido polo catedrático e fundador do grupo de investigación en nanotecnoloxía e Magnetismo da USC, José Rivas, e foi construído cunha superficie duns 26.000 metros cadrados na cidade portuguesa de Braga. As instalacións acollerán a 200 científicos de todo o mundo, así como outros 200 estudantes.

Segundo explicou José Rivas, o INL traballará de forma conxunta con universidades e centros de investigación de todo o mundo, e supón "unha oportunidade de reforzar lazos e abordar o porvir baseándose nunha sociedade do coñecemento". Tamén subliñou que a presenza de 400 investigadores será "todo un reto de convivencia multicultural" e adiantou que o laboratorio xa ten unha decena de acordos para desenvolver proxectos de postgrao e outras iniciativas en colaboración con países de Asia e Norteamérica, ademais da Península Ibérica.

O Laboratorio de nanotecnoloxía de Braga centrará os seus esforzos en catro áreas de investigación relacionadas coa nanotecnoloxía: a nanomedicina; o control ambiental, de calidade alimentaria e de seguridade; a nanoelectrónica; e a nanomanipulación.