AGE denuncia que o PP quere "naturalizar" o pagamento pola sanidade e converter en "ricos ou pobres" os cidadáns

SANTIAGO DE COMPOSTELA 14 Oct. (EUROPA PRESS) -

A vicevoceira de Alternativa Galega de Esquerda (AGE), Yolanda Díaz, denunciou que o PP quere introducir cambios "ideolóxicos" no sistema de benestar e "naturalizar" o pagamento pola sanidade, ao tempo que converter os cidadáns en "ricos ou pobres" con medidas como o novo copagamento farmacéutica --que afecta a medicamentos de dispensa hospitalaria-- e a suba do imposto de hidrocarburos, coñecido como o 'céntimo sanitario'.

En declaracións aos medios nos corredores do Parlamento, Yolanda Díaz referiuse ás recentes medidas anunciadas para remarcar que "Galicia debe rebelarse" contra o novo copagamento, porque, como recoñeceu a Xunta, "non ten ningún impacto" nas contas".

A este respecto, a deputada de Alternativa subliñou que se trata dunha medida "regresiva" para o común da xente, e defendeu que o seu grupo avoga por que a redistribución fiscal se fai "no sistema tributario". Yolanda Díaz indicou que "é posible introducir novos impostos" e mesmo romper con medidas de "contraciclo".

Así as cousas, criticou que se pretenda "naturalizar que agora imos ter que pagar pola sanidade por unha crise que non provocamos". "É unha barbaridade", resaltou a parlamentaria de AGE, quen subliñou que o seu grupo "non está de acordo" con ningunha desas dúas medidas e quen advertiu de que "nos coloca no peor da nosa historia".

A parlamentaria de Alternativa insistiu en que son medidas para "introducir un modelo ideolóxico de converternos en ricos e pobres".