As obras da estación intermodal de Pontevedra están executadas ao 60% e finalizarán este verán

PONTEVEDRA 6 Abr. (EUROPA PRESS) -

As obras da estación intermodal de Pontevedra avanzan a bo ritmo e xa están executadas ao 60 por cento, polo que a Xunta prevé a súa finalización para este verán.

O vicepresidente primeiro, Alfonso Rueda, a conselleira de Infraestruturas e Mobilidade, Ethel Vázquez, e o alcalde de Pontevedra, Miguel Anxo Fernández Lores, supervisaron este martes o avance dos traballos da intermodal.

Ethel Vázquez destacou que estas obras roldan o 60% da súa execución total, "polo que no verán esta infraestrutura estará a disposición de veciños e usuarios", despois dun investimento de 6 millóns de euros, dos que a Xunta achegou 4,6 millóns.

Vázquez explicou que se están executando dúas actuacións de maneira paralela: a remodelación integral da estación de autobuses e o proxecto de adecuación para a intermodalidade.

A titular de Infraestruturas no Goberno galego sinalou que a reforma integral da estación, que inclúe a renovación da fachada, cuberta, interiores e mellora das instalacións, está avanzada e que próximos traballos serán os pavimentos e revestimentos, xunto coa intervención na fachada.

En canto ao proxecto de intermodalidade, subliñou que a praza de acceso fronte á estación de autobuses para conectar as dúas estacións está xa practicamente finalizada e estase executando o itinerario peonil entre as dúas estacións, coa estrutura da pasarela xa visible, e o novo acceso desde a avenida Josefina Arruti.

GRAN SATISFACCIÓN

O alcalde de Pontevedra, Miguel Ángel Fernández Lores, mostrou a súa "satisfacción" por este proxecto e referiuse concretamente ao novo acceso e o peche do ramal actual de entrada á estación, que está previsto no mes de maio.

Esta parte permitirá "destapar" o río Gafos e polo en valor, adecuando toda a súa contorna e gañando un novo espazo público de gran valor ambiental. Tamén valorou que todas as peticións que fixo o Goberno local recolléronse no proxecto.

Pola súa banda, Alfonso Rueda destacou o compromiso da Xunta coa cidade, cun investimento de case 200 millóns de euros con grandes obras como a estación intermodal, o gran Montecelo, o edificio de Benito Corbal ou as melloras no saneamento da ría, con proxectos como a mellora da depuradora de Os Praceres ou o impulso ao novo emisario submarino.