O BNG pide a comparecencia de Rueda no Parlamento para que explique "por que traballa en contra" do idioma galego

   SANTIAGO DE COMPOSTELA, 28 May. (EUROPA PRESS) -

   A portavoz nacional do BNG, Ana Pontón, pediu a comparecencia do presidente da Xunta, Alfonso Rueda, no Parlamento de Galicia para que explique por que "está a traballar en contra dos intereses de Galicia" para pór "cancelas" á lingua galega.

   "Xa solicitamos a súa comparecencia no Parlamento para que informe de cales son as razóns que o levan a estar a traballar en contra dos intereses de Galicia, para pór cancelas á nosa lingua, cando o que necesitamos é apoiar ao noso idioma nunha situación de emerxencia lingüística", afirmou en declaracións aos medios despois de visitar as instalacións da empresa Nudesa, en Silleda.

   Así, Pontón lamentou que a Xunta estea "ao servizo da estratexia partidista do PP en Madrid". Nesta liña, volveu a denunciar que o PP "utiliza Galicia única e exclusivamente no seu 'pim pam pum'" co Goberno central para "seguir nunha estratexia de desgaste", sen importarlle, engadiu, "que Galicia perda".

   O último exemplo, destacou a líder do BNG, ocorreu esta semana, onde, tal e como expuxo a nacionalista, "o PP manobrou, chamou e presionou para que o galego non se recoñecese de maneira oficial na Unión Europea".

"DESLEALDADE A GALICIA"

   "É unha vergoña e unha deslealdade a Galicia que ese tándem Feijóo-Rueda, un expresidente da Xunta e o actual, estivesen a traballar en contra do recoñecemento do galego na Unión Europea", reprochou.

   Para Pontón isto foi "un exemplo máis" de como Rueda "utiliza a estratexia partidista do PP sen importarlle que iso teña consecuencias negativas" para Galicia. "Preguntámonos por que lles molesta tanto o galego e por que queren pecharlle as portas, cando é o momento de abrirllas, e por que o PP está disposto a traballar unha vez máis en contra do galego", cuestionou.

   Por todo iso, Ana Pontón cre que Rueda debe "responder a estas preguntas", polo que o BNG xa solicitou a súa comparecencia na Cámara Galega para que informe de "cales son as razóns que o levan a estar a traballar en contra dos intereses de Galicia" nunha situación, concluíu, "de emerxencia lingüística".