Bombeiros de Ferrol denuncian falta de efectivos no incendio de Recimil e esixen explicacións ao alcalde

   FERROL, 19 Feb. (EUROPA PRESS) -

   Bombeiros de Ferrol denunciaron a falta de efectivos no parque da cidade departamental para atender o incendio orixinado esta madrugada no barrio de Recimil, no que resultaron feridas catro persoas, entre elas un menor de tres anos e un bombeiro, ao que tiveron que amputar unha perna.

   Os profesionais de emerxencias desprazáronse este mediodía ao Concello para tratar de reunirse co alcalde, José Manuel Rey Varela, para esixirlle explicacións.

   Segundo fontes do corpo de bombeiros consultadas por Europa Press, no momento do incendio había tres efectivos no parque ferrolán, aos que sumaron outros cinco do parque de Narón máis tarde.

   "Isto viña avisando desde hai tempo. Nunca pasa ata que pasa, e isto é a pinga que colma o vaso", lamentaron, ademais de criticar que o rexedor afirme que "foi mala sorte" e que os protocolos "funcionaron".

   Agora, os bombeiros esixiron unha reacción ao Goberno municipal e demandaron unha reunión para expor as problemáticas que lles afectan.

   Neste sentido, sinalaron estas mesmas fontes, o alcalde comprometeuse a "abrir vías de diálogo" para abordar a "falta de persoal, de organización e liquidar o tema de que teñen que entrar novos efectivos".