Centos de persoas alzan as súas chaves en Vigo para pedir medidas fronte á situación de "emerxencia habitacional"

   VIGO, 21 Mar. (EUROPA PRESS) -

   Varios centenares de persoas participaron esta tarde en Vigo nunha manifestación que reivindicaba o "dereito a teito" e a aplicación de medidas "inmediatas" que permitan atallar a situación de "emerxencia habitacional", como a declaración da cidade como zona tensionada e a ampliación do parque público de vivenda a partir da existente.

   A protesta reuniu a ao redor de 700 e 800 persoas, segundo as estimacións da organización. Estaba convocada por Alianza pola Vivenda en Vigo, que liderou a marcha desde a súa saída, ás 18.00 horas na Praza de España, cunha pancarta que clamaba 'Vigo polo dereito ao teito'.

   Este colectivo local está integrado por máis dunha ducia de entidades sociais e políticas, como o Sindicato de Inquilinas de Vigo, o Foro Socioeducativo As Ninguéns e a Plataforma Galega Vivenda Xa!, que contaron con bloques propios.

   A mobilización rescatou o que foi o principal símbolo durante as marchas celebradas en toda España no último ano e medio: as chaves. O seu son escoitouse por primeira vez no cruzamento de Gran Vía con Urzaiz, cando un dos líderes da marcha --quen sostiña o megáfono-- pediu a todos os asistentes que as alzasen como símbolo contra a crise da vivenda.

   O percorrido terminou ante a Delegación da Xunta, unha das institucións ás que sinalan directamente, xunto ao Concello. No seu traxecto escoitáronse numerosos cánticos que cargaban contra a especulación e reivindicaban a vivenda como un dereito: "A casa, o teito, para todas un dereito", "Co prezo do aluguer non chego a fin de mes" e "Ou seu beneficio é a nosa ruína".

   O portavoz da Alianza, Juan Medela, criticou o pasado martes, durante a presentación da manifestación, que a media dos alugueres en Vigo supere os 700 euros e siga subindo. Fronte a isto, dixo, as medidas que están a pór en marcha as distintas administracións "non van resolver a situación actual".

APLICACIÓN DE MEDIDAS "INMEDIATAS"

   "O acceso a unha vivenda digna deixou de ser un dereito para converterse nun privilexio reservado a quen pode pagalo, froito da especulación, os prezos disparados, a escaseza de oferta e unha resposta institucional insuficiente", censurou o manifesto lido esta tarde.

   Neste sentido, o texto resumía en cinco as medidas "inmediatas" propostas para porlle coto. Entre outros, urxiron a declaración da cidade como zona de mercado residencial tensionado, que o Concello aínda non solicitou á Xunta, para permitir o control dos prezos.

   Tamén demandaron un plan plurianual para a ampliación do parque público de vivenda a partir da xa existente; unha moratoria das licenzas de vivendas de uso turístico e a súa limitación por barrio; un censo de persoas sen fogar, e máis prazas de residencias para estudantes.