A CIG censura a "hipocrisía" de Fabiola García por "calar" tras recoñecer Rueda que coñecía a denuncia a Villares

   SANTIAGO DE COMPOSTELA, 5 Jun. (EUROPA PRESS) -

   A CIG reprochou á conselleira de Política Social e Igualdade, Fabiola García, o seu "silencio" e "hipocrisía" tras recoñecer o presidente da Xunta, Alfonso Rueda, que coñecía a denuncia a Alfonso Villares por unha presunta agresión sexual desde febreiro e cuestiona que ese mesmo mes a titular de Igualdade denunciase ao sindicato nacionalista por un cartel "sexista" e agora "escóndese e cala ao tratarse dun compañeiro de partido".

   Nunha nota de prensa, a sección de Política Social da CIG pide á conselleira que "non se esconda nin cale" ante o titular do Goberno galego, quen, tal e como apunta o sindicato, "deixou no seu posto, durante tres meses, a un conselleiro denunciado por agresión sexual".

   Neste sentido, a CIG reprocha que en febreiro Fabiola García denunciase á central sindical por un cartel "sexista" no que mentres se reivindicaba máis persoal para residencias de maiores aparecía un debuxo, a modo de caricatura da conselleira, dunha muller sentada nun sofá, cun bolso de marca e que afirma que lle "matan" as rebaixas.

   "Ese mesmo mes de febreiro o presidente Rueda coñecía a acusación a un conselleiro por agresión sexual e mantívoo no seu posto ata que o propio denunciado presentou a súa dimisión", censura a CIG.

   Para o sindicato, Fabiola García, "co seu silencio", evidencia "a súa falsidade e hipocrisía cando critica unha viñeta por sexista e escóndese e cala cando se trata dun compañeiro de partido e de reunións".

   Ademais, a CIG pregunta á responsable de Igualdade da Xunta se ela tamén coñecía esta denuncia contra o exconselleiro do Mar por unha presunta agresión sexual.

    "Se unha viñeta dun cartel feito para denunciar a situación das traballadoras das residencias da Terceira Idade chegou á categoría de sexista e machista, que ocorre agora coa actuación dun presidente da Xunta que mantivo durante máis de tres meses a un conselleiro acusado de agresión sexual?", cuestiona antes de preguntar tamén a García se non considera que "merece algún tipo de reproche" pola súa parte "esta permisividade e inacción ante unha acusación de tanta gravidade".

   Por todo iso, a CIG pide publicamente o "posicionamento" de Fabiola García en relación "co comportamento do presidente Rueda" que, insiste, "calou e mantivo no seu posto a un conselleiro acusado de agresión sexual".

OBSERVATORIO

   Así mesmo, a CIG aproveitou o pleno do Observatorio Galego da Violencia de Xénero para esixir un "pronunciamiento" da Xunta tras coñecerse os motivos da dimisión do conselleiro do Mar.

   En concreto, o sindicato pediu "tolerancia cero" cos agresores sexuais, á vez que reclamou xustiza e reparación para a vítima.

   "Non se pode tolerar que un representante do Goberno galego utilice o seu escano e os medios de comunicación para negar os feitos, aproveitándose da súa condición de conselleiro para manifestar a súa inocencia, facendo entender que foi obxecto dunha denuncia falsa", censurou Margarida Corral.

   Do mesmo xeito, solicitou a apertura dunha investigación para saber de onde saíu a filtración de nome da vítima. Tamén cuestionou como é posible que o resto do Executivo, "con Rueda á cabeza, non fixese nin unha soa mención á necesidade de denunciar e de manifestar o apoio ás mulleres que denuncian unha agresión ou situación de violencia".

   "Máis ben todo o contrario, xa que permitiron que o investigado saíse entre aplausos e expresaron o seu desexo de que poida volver á vida pública", lamentou.

   Nesta mesma liña, a representante da CIG incidiu en que a violencia de xénero "non é un asunto privado", senón que é "un problema estrutural e social que require de pronunciamientos sen fisuras e de actuacións firmes".