A CIG chama ao alcalde de Ames "mentireiro compulsivo" ante a sentenza que declara legal a folga de Lousame

SANTIAGO DE COMPOSTELA, 22 Feb. (EUROPA PRESS) -

O secretario nacional da Federación de Servizos da CIG, Paulo Rubido, chamou ao alcalde da localidade coruñesa de Ames, Carlos Fernández, "mentireiro compulsivo, manipulador e provocador" a raíz da sentenza do Xulgado do Social número 1 de Santiago de Compostela que declara legal a folga que mantiveron traballadores da planta de reciclaxe de Lousame durante unha semana do pasado mes de novembro.

A "campaña" que, no seu día, emprendeu Fernández en contra da folga --quen, segundo criticou o sindicalista en rolda de prensa, acusou a convocatoria de "política e ilegal" polo seu carácter "novatorio e rotatorio"-- ten "unha agravante" no feito de que o rexedor de Ames sexa tamén presidente da Federación Galega de Municipios e Provincias (Fegamp), subliñou Rubido.

"É bastante impropio que un personajillo como este, que anda ameazando traballadores, xa non solo sexa alcalde, senón presidente da Fegamp", reprobou. En concreto, a folga convocouse con carácter indefinido e solo foi avalada por empregados de FCC Lousame que realizaban tarefas de recollida de lixo nos municipios de Carnota e Ames, dende o 12 ao 18 de novembro.

Ante o ditame do xulgado compostelano --fronte ao que só cabe interpoñer recurso de suplica ante o TSXG--, o responsable de Servizos da CIG asegurou que a central nacionalista, xunto ao comité de empresa -- ambos os dous foran denunciados pola empresa Fomento de Construcións e Contratas S.A., que ten concertada a prestación de recollida de lixo coa comunidade de concellos de Serra do Barbanza--, "seguirán denunciando a situación da planta de Lousame".

A DÉBEDA "SEGUE EXISTINDO"

Isto débese a que, segundo destacou Paulo Rubido, o volume de débeda que os municipios manteñen con ela "xa non é da mesma gravidade", pero "segue existindo". Aínda que Lousame desenvolve unha actividade "máis ecolóxica" que outras plantas, como a de Sogama, "recicla demasiado", explicou.

De aí que tanto Rubido como membros do comité de empresa --presentes na comparecencia de prensa-- reclamen a "mediación" da Xunta coa sociedade Ecoembes, co propósito de garantir a "viabilidade" de Lousame e o mantemento dos servizos que subministran aos nove concellos que conforman a mancomunidade. A devandita mediación "si se pediu", pero o Goberno galego "non responde e non fai nada", censuraron