Continúa o tirón da compravenda de vivenda en Galicia cun aumento do 16,8% en abril

    SANTIAGO DE COMPOSTELA, 19 Jun. (EUROPA PRESS) -

    A compravenda de vivendas en Galicia foi de 2.059 en abril, o que supón un 16,8% máis en comparación co mesmo mes de 2024, segundo os datos que publica o Instituto Nacional de Estatística (INE) este xoves.

    Deste xeito, continúa o tirón das compravendas de vivendas na comunidade galega no que vai de ano, cun total de 8.754 no primeiro cuadrimestre, máis dun milleiro por encima do mesmo período de 2024 (+15,65).

    Pola súa banda, o aumento do mes abril en Galicia é 14 puntos superior ao 2,3% da media española no cuarto mes. É o quinto maior entre comunidades, coa Rioxa na cabeza (+25,2%).

    No entanto, na comparación de abril con marzo hai un recorte de preto dun centenar respecto das 2.163 do mes anterior.

    Das operacións de compravenda de abril, 1.983 realizáronse sobre vivendas libres e 76 sobre inmobles de protección oficial. Atendendo á antigüidade, 502 operacións corresponderon a vivendas novas e 1.557 estiveron relacionadas con edificios usados.

    En abril realizáronse un total de 3.784 operacións sobre vivendas na comunidade. Ademais das 697 compravendas, 922 foron herdanzas, 23 doazóns e sete permutas, xunto a 773 doutro tipo.

LEIRAS TRANSMITIDAS

    En total, durante o cuarto mes do ano transmitíronse en Galicia 9.321 leiras, neste caso un 10% menos que as máis de 10.000 dun ano antes.

    Estas leiras son 6.916 urbanas (3.861 compravetnas, 1.551 herdanzas, 45 doazóns, 16 permutas e 1.443 doutro tipo) e 2.405 rústicas (718 compravendas, 1.082 herdanzas, 19 doazóns, 27 permutas e 559 doutro tipo).