A Coruña renuncia a ser sede do Mundial de Fútbol 2030 e acorda con Abanca reformar o estadio de Riazor

A CORUÑA 16 Mar. (EUROPA PRESS) -

A cidade herculina renuncia a ser sede da Copa do Mundo que celebrarán conxuntamente España, Marrocos e Portugal en 2030 e acorda con Abanca reforzar o estadio de Riazor. A Deputación da Coruña colaborará nesta reforma integral, que incluirá outros espazos da cidade deportiva.

Así o confirmaron este luns após a firma dun acordo a alcaldesa da cidade herculina, Inés Rey; o presidente do Deportivo e dono de Abanca, Juan Carlos Escotet, e o presidente da Deputación da Coruña, Valentín González Formoso.

"Estabamos plenamente capacitados pero isto implica esixencias organizativas e de investimento", asegurou a rexedora, para apuntar que A Coruña non pode ser sede do Mundial "a calquera prezo" e por este motivo retira a candidatura da cidade.

Doutra banda, anunciaron unha "nova etapa de colaboración" entre o Concello e o Deportivo coa firma dun acordo con Abanca, accionista maioritario do equipo, para "impulsar a modernización de toda a cidade deportiva, o estadio e instalacións deportivas" co apoio da Deputación da Coruña.

Respecto diso, Escotet sinalou que este pacto suporá un "crecemento ordenado do Deportivo". "A colaboración público privada é a mellor ferramenta para servir aos intereses xerais", recalcou.

Pola súa banda, González Formoso mostrouse "ilusionado" con esta "onda de melloras de infraestruturas" da Coruña, reivindicando que mecen a "aposta clara" da Deputación. "Espero que vaia acompañado de éxitos deportivos", manifestou.