Interceptado un furtivo con máis de 30 quilos de marisco extraídos de modo irregular en Cee (A Coruña)

   SANTIAGO DE COMPOSTELA, 17 Jun. (EUROPA PRESS) -

   O Servizo de Gardacostas de Galicia interceptou a un furtivo con máis de 30 quilos de marisco extraídos de modo irregular no municipio de Cee (A Coruña).

   Segundo informou a Consellería do Mar, na tarde deste pasado mércores levou a cabo un operativo conxunto do Servizo Marítimo da Garda Civil e Gardacostas que permitiu interceptar a un furtivo que extraera máis de 30 quilos de marisco de modo irregular no porto de Cee.

   Os axentes, indican as mesmas fontes, decatáronse de que o presunto infractor extraía recursos mediante mergullo nas proximidades do espigón do peirao, polo que realizaron un seguimento até o momento en que ía abandonar o porto no seu vehículo coas capturas obtidas.

   Este operativo, destacou Mar, permitiu "comprobar que o interceptado carecía do permiso necesario para exercer o marisqueo" e que, engade, "o facía con medios prohibidos", mediante mergullo coa axuda dunha botella de osíxeno, polo que infrinxía varios artigos da Lei de Pesca de Galicia.

   Ante esta situación, os axentes procederon a interceptar o marisco que levaba no vehículo --25 quilos de ameixa e algo máis de sete de berberecho--, así como a intervir os útiles empregados, entre os que había dúas aletas, unhas lentes, a botella de osíxeno e o chaleco do equipamento de mergullo, ademais dun saco de rede, un par de luvas e un cinto con chumbos.

   O marisco intervido foi levado á lonxa de Corcubión para o seu pesado e, posteriormente, entregado ao persoal do Servizo de Gardacostas de Galicia para o seu sementa na mesma zona na que foi extraído.