Licitado outro tramo da AG-42 (Tui-A Guarda), que unirá o enlace de Areas coa PO-350, con 18 millóns de investimento

938049.1.260.149.20250109175803

TUI (PONTEVEDRA), 9 (EUROPA PRESS)

O presidente da Xunta, Alfonso Rueda, anunciou este xoves a licitación dun novo tramo da autovía AG-42 (Tui-A Guarda), que unirá o enlace de Areas coa PO-350 e no que se investirán uns 18 millóns de euros.

Así o trasladou nun acto que tivo lugar no punto no que se farán as obras, e no que tamén participaron a conselleira de Vivenda e Planificación de Infraestruturas, María Martínez Allegue, e diversos alcaldes, alcaldesas e representantes municipais do Baixo Miño.

Rueda puxo en valor a importancia estratéxica desta autovía, en construción desde hai anos, e recoñeceu que o proxecto dunha infraestrutura desta envergadura non é sinxelo de acometer. Por iso, subliñou que a construción da AG-42 foi froito do "diálogo" e o "consenso".

Así mesmo, remarcou a necesidade de que "acabar o empezado", en referencia a unha autovía que deu os seus primeiros pasos hai máis de 20 anos, entón coa denominación de Vía de Alta Capacidade (VAC) e que segue en obras. Nese sentido, Rueda reivindicou o compromiso da Xunta de completar o trazado da autovía "até o final", para o que xa "se están facendo os trámites administrativos".

Após a posta en servizo da chamada Ligazón de Areas, fai algo menos dun ano, o novo tramo, de case 4 quilómetros, comezará a construírse a mediados de 2025 e a obra ten un prazo de execución de 24 meses.

O presidente da Xunta recalcou que a AG-42 mellorará a mobilidade dos veciños do Baixo Miño e tamén a das empresas, mellorando a súa competividad. En total, esta autovía implicará un investimento global de 188 millóns de euros, incluíndo os tramos xa en servizo.

Por outra banda, Rueda subliñou que o goberno galego segue traballando paralelamente no remate da autovía Santiago-A Estrada, a de Santiago-Noia, a do Salnés e a de Nadela-Sarria; e tamén lembrou a recuperación a concesión de catro autoestradas autonómicas (Salnés, Barbanza, Ourense-Celanova e Santiago-Brión), que permite un aforro ás arcas públicas de máis de 340 millóns de euros.

"FIRME COMPROMISO" COAS INFRAESTRUTURAS

Pola súa banda, a conselleira de Vivenda e Planificación de Infraestruturas, María Martínez Allegue, reivindicou o "firme compromiso" da Xunta coa construción e remate deste tipo de infraestruturas de altas prestacións.

Do mesmo xeito, subliñou que os orzamentos galegos de 2025 destinan 265 millóns de euros para a Axencia Galega de Infraestruturas, dos que 63 millóns van para vías destas características, e 68 millóns para conservación e mantemento.