Porto de Vigo afirma que o Concello debe pagar a taxa dos túneles e "logo reclamar" se non está de acordo

EUROPA PRESS

VIGO, 21 Nov. (EUROPA PRESS) -

O presidente da Autoridade Portuaria de Vigo, Ignacio López-Chaves, considerou que o Concello "pode ir aos tribunais" se non está de acordo co abono de taxas polos túneles do Areal e Beiramar que se lle solicita, se ben precisou que "xa que os cidadáns pagan e logo reclaman, as administracións públicas deben tamén pagar e despois reclamar".

Nunha rolda de prensa, o presidente portuario mantivo que a Avogacía do Estado di que este canon é aplicable ao Concello de Vigo e, nese sentido, apunta que a Administración local obtén unha "rendibilidade" polos ingresos que lle supoñen as multas dos radares situados nos dous tramos. De feito, afirmou que, en concepto de sancións, "ingresa máis" do que ten que pagar polas taxas.

López-Chaves asegurou "lamentar que existan este tipo de desacordos" así como que estas cuestións pasaran de abordarse "nas negociacións que xa existían" para dar un "salto ao terreo político".

Tamén advertiu de que, co non pagamento das taxas, o Porto "ten menos ingresos" e, polo tanto "menos investimentos e menor competitividade", o que, á súa vez, afecta ao emprego e ao crecemento económico de Vigo.

Así, avogou por "falar" para abordar as "diferenzas" co obxectivo de "intentar evitar desacordos", recordando ademais que o ano pasado Autoridade Portuaria e Concello pecharon un acordo de compensación de débedas que incluía estas taxas.

CONCELLO

Para o concelleiro de Fomento vigués, David Regades, a xustificación de que o Concello obtén ingresos do cobramento de sancións de tráfico é unha "razón peregrina" por parte de López-Chaves, a quen lle precisou que "os radares non están para recadar senón para velar pola seguridade do tráfico".

Así mesmo, o edil socialista volveu xustificar a negativa municipal a pagar as taxas dos túneles en que, segundo "o artigo 93 da lei 33/2003, non procede pagar este canon".

Regades, que criticou ademais que este ano o Porto quere "subir" o canon da primeira fase do túnel de 900 a 140.000 euros, o mesmo importe que o da segunda fase; defendeu que "o diñeiro dos vigueses hai que xestionalo ben" e recalcou ademais que "ten que cumprirse a lei".

A ese respecto, indicou que "xa noutras ocasións se contemplou como o Porto incumpría a lei e os tribunais deron a razón ao Concello" e, no que respecta aos túneles, acusou a López-Chaves de non querer "cumprir" a norma.