O PPdeG ve na Conferencia de Presidentes un "novo paripé" do Goberno para "tapar o vendaval de corrupción"

   SANTIAGO DE COMPOSTELA, 30 May. (EUROPA PRESS) -

   O portavoz parlamentario do PPdeG, Alberto Pazos Couñago, referiuse este venres á convocatoria, para o próximo 6 de xuño, dunha nova Conferencia de Presidentes, á que cualificou como un "novo paripé" do Goberno para "tapar o vendaval de casos de corrupción afectan directamente Sánchez e ás altas esferas do PSOE".

   Neste sentido, asegurou que o Grupo Popular apoia "firmemente" a postura adoptada polo Goberno galego "de rexeitar o intento do Goberno de centrar esta Conferencia de Presidentes nos temas de vivenda e formación profesional e universitaria, e convertela nun monólogo de Sánchez, quedando as comunidades autónomas como meros espectadores, sen posibilidade de debater e facer achegas".

   "De pouco vale que se acepte incorporar algunha das propostas que se puxeron enriba da mesa por parte das comunidades autónomas, se ao final prívaselles de calquera debate ou intercambio de opinión sobre as mesmas entre os presidentes autonómicos e do Goberno", sinalou nunha rolda de prensa celebrada este venres en Santiago.

   Con todo, o popular instou ao Goberno a ter presente que "o éxito das Conferencias de Presidentes non se mide polo número de reunións que se celebran, senón polos acordos e consensos aos que se chegan dentro delas".