Renfe tamén remite ao xuíz a documentación que o requiriu no auto

SANTIAGO DE COMPOSTELA 29 Ago. (EUROPA PRESS) -

Renfe remitiu este xoves ao xuíz Luis Aláez, do Xulgado de Instrución Número 3 de Santiago, que instrúe as dilixencias polo accidente ferroviario do 24 de xullo, a documentación que lle foi solicitada nun auto emitido o 20 de agosto.

Fontes da operadora ferroviaria explicaron que se enviou a documentación solicitada polo xuíz, entre a que se atopan os protocolos ou documentos onde se recollen os procesos relacionados coa seguridade na circulación non contemplados nos demais documentos regulamentarios que establece o regulamento xeral de circulación; así como o protocolo de uso dos teléfonos corporativos durante a circulación dun tren e o protocolo de persoal en cabina.

Así mesmo, o instrutor tamén pediu un informe indicativo das persoas que integran o órgano responsable en materia de seguridade na circulación, con indicación das capacidades ou facultades de cada unha delas na toma de decisións.

En terceiro termo, o xulgado reclamou un informe sobre a realización de auditorías internas sobre algunha incidencia no tramo da vía que une as estacións de Ourense e Santiago, entre o punto quilométrico onde se produciu o descarrilamento e os dez quilómetros anteriores, e de existir, que se acompañasen a ese documento.

Tamén o Adif enviou nesta mesma xornada a documentación requirida, entre a que figura a lista de responsables de seguridade no tramo Santiago-Ourense no que se produciu o sinistro do pasado 24 de xullo, segundo indicaron a Europa Press fontes do organismo xestor de infraestruturas ferroviarias.