Rueda espera que o proceso do traspaso da AP-9 continúe a pesar das "limitacións" polo adianto electoral

SANTIAGO DE COMPOSTELA 5 Oct. (EUROPA PRESS) -

O presidente da Xunta, Alfonso Rueda, espera que o proceso iniciado para o traspaso da AP-9 poida continuar a pesar das "limitacións" que supón o adianto electoral anunciado polo presidente do Executivo central, Pedro Sánchez.

Na rolda de prensa posterior ao Consello da Xunta deste luns, o líder galego recoñeceu que a convocatoria de eleccións supón "unha serie de limitacións", pero "isto non quere dicir, nin moito menos, que todo se paralice".

Rueda explicou que esta mesma mañá o Boletín Oficial de Estado (BOE) publicou o acordo da comisión bilateral entre a Xunta e o Goberno, que crea un grupo de traballo e comunica a discrepancia entre as dúas administracións ao Tribunal Constitucional.

Por iso, el espera que o Executivo manteña esta comisión para seguir negociando o traspaso da AP-9, co financiamento "apropiado".

Alfonso Rueda tamén se referiu á transferencia das competencias sobre os permisos de traballo e de residencia, unha petición da Xunta porque "as cousas se poden facer bastante máis rápido e mellor".

Aínda que asegurou que o Goberno foi "bastante rañicas" respecto ao ofrecemento de medios, considera que Galicia gañará se se xestiona dentro do ámbito autonómico. Por isto, será a primeira transferencia que reclamará ao novo Executivo.

O presidente galego considera que hai que pedir "o útil" e non "transferencias ao quilo, como lle gusta a algún partido da oposición en Galicia". "Creo que iso non leva a ningunha parte. Moito mellor as que realmente consideramos útiles e unha vez conseguidas, ir a por as seguintes", engadiu.

Rueda reivindicou que a Xunta "non está en período electoral", polo que espera que se poida seguir traballando para chegar a acordos. Esa é a "actitude" do Goberno galego, dixo.