Rueda traslada o pésame polos falecementos que puidesen ter relación co apagamento

   SANTIAGO DE COMPOSTELA, 29 Abr. (EUROPA PRESS) -

   O presidente da Xunta, Alfonso Rueda, trasladou o pésame á familia das persoas que perderon a vida nas últimas horas "cuxo falecemento tivese, dunha maneira ou doutra, relación co apagamento e as súas consecuencias".

   Así iniciou a súa comparecencia na tarde deste martes para facer balance da situación actual e do ocorrido pasadas 24 horas de que se producise a caída da subministración eléctrica.

   "Primeiro, lamentar e dar o pésame ás familias das persoas falecidas, cuxo falecemento tivese, dunha maneira ou doutra, relación co apagamento e as súas consecuencias durante estas últimas horas", manifestou.

   E é que, este martes foron achados mortos nunha vivenda do municipio ourensán de Taboadela tres membros dunha familia --un matrimonio e o seu fillo-- debido a unha intoxicación por monóxido de carbono que, segundo as primeiras investigacións, procedía dun xerador cedido polo concello para asistir a un respirador que necesitaba unha das vítimas.

   Así mesmo, segundo recolle o 112 Galicia e apuntou o conselleiro de Presidencia, Xustiza e Deportes, Diego Calvo, esta xornada tamén se notificou a morte doutro tres persoas que, segundo fontes da Xunta consultadas por Europa Press, falecerían por causas naturais.

   En concreto, trátase dun home de 59 anos con distintas patoloxías que foi achado morto en Ferrol despois de que a súa sobriña o botase en falta; outro home de 81 anos de Betanzos, que apareceu falecido esta mañá; e un home de Dumbría, de 86 anos.