Sánchez Vidal (BNG) augura un escenario "complicado" se se anula o PXOM de Ourense porque se volvería ao de 1986

OURENSE, 25 Abr. (EUROPA PRESS) -

O tenente de alcalde do Concello de Ourense, Alexandre Sánchez Vidal, sinalou que cunha "sentenza firme" sobre a anulación do Plan Xeral de Ordenación Municipal de Ourense o escenario "sería moi complicado" xa que estaría vixente o plan do ano 1986, "coas modificacións puntuais previas ao de 2003".

Sánchez Vidal sinalou que a sentenza do TSXG afecta a "case a totalidade" dos proxectos de futuro da cidade de Ourense. Nunha rolda de prensa, Sánchez Vidal, acompañado do edil de Infraestruturas, Andrés García Mata, opinou que a mellor opción pasa polo recurso de casación ante o Tribunal Supremo porque permite "gañar o tempo suficiente, de tres ou catro anos".

Na súa opinión, isto facilitaríaa elaborar un novo plan e xestionar todo aquilo que teña relación con vivenda pública, termalismo, dotacións de carácter sanitario, deportivo, centros da terceira idade e zonas verdes". "Son actuacións en marcha e non as podemos parar", aseverou.

O tenente de alcalde avogou para solucionar este "problema importante" para a cidade de Ourense cun "pacto de cidade". Nese sentido, culpou de novo do PXOM o goberno anterior do PP pero cre que "non é o momento de facer reproches". De feito, apostou por que haxa "unidade absoluta no goberno municipal e integrar na xestión da solución ao PP" ademais de "aos cidadáns" dende as "asociacións de consumidores, asociacións veciñais, Colexio de Arquitectos, ou asociacións da construción".

INCÓGNITAS.

O dirixente do BNG sinalou que esta sentenza xudicial que anula o PXOM "formula moitas incógnitas preocupantes" xa que coloca a cidadáns do perímetro rural cunha propiedade e con licenza para construír unha vivenda "que se vexan afectados pola falta de plan".

De feito, indicou que cuestiones como as hipotecas sobre os pisos "perigarían" por o que a anulación do PXOM "afecta a cidadáns con nomes e apelidos desta cidade que teñen hipotecas en vigor" así como a "construtores honestos e honrados que dan emprego e solucións a esta cidade".

"Dende a seriedade e a responsabilidade propoñemos un calendario e que o recurso nos permita un tempo para elaborar o plan", recalcou Sánchez Vidal, quen engadiu que ese "pacto de cidade" debe "xestionar a situación transitoria ante esta incerteza".

O dirixente nacionalista incidiu que neste "escenario de unidade" se propón "eliminar os reproches" ao PP e pediu que o goberno municipal "actúe compasado e ao unísono sen diferenzas internas".