Seguen sen control os lumes de Ponteceso e Camariñas que obrigaron a desaloxos: arrasan máis de 100 hectáreas

1000276.1.260.149.20250806152832

   SANTIAGO DE COMPOSTELA, 6 Ago. (EUROPA PRESS) -

   Os incendios forestais dos municipios coruñeses de Ponteceso e Camariñas, iniciados o pasado martes e que obrigaron a desaloxos de veciños ao declararse a Situación 2 por perigo para casas, continúan sen control pasadas as 15,00 horas deste mércoress após arrasar 110 hectáreas entre ambos.

    A Garda Civil informou que os veciños desaloxados puideron volver ás súas vivendas ao longo da noite.

   O incendio de Camariñas, parroquia de Xaviña, segue activo após iniciarse ás 16,57 horas do martes. Declarouse a Situación 2 por perigo para casas no núcleo de Pedrouso. Entre outros medios, participan un helicóptero e seis motobombas. Queima 50 hectáreas, segundo os últimos datos ofrecidos pola Consellería do Medio Rural na mañá deste mércores.

    No caso de Ponteceso, parroquia de Corme Aldea, o lume segue activo após comezar ás 14,12 horas do martes. A Xunta sostén que este lume foi "intencionado" ao declararse en catro focos por encima de Guxín nunha xornada de fortes ventos do nordeste. Participan dous avións --durante boa parte do martes non puido haber medios aéreos por condicións meteorolóxicas-- e 11 motobombas, entre outros. Queima 60 hectáreas, segundo datos de primeira hora da mañá de Medio Rural.

   A Unidade Militar de Emerxencias (UME) incorporouse durante a noite do martes aos labores de extinción dos incendios de Ponteceso e Camariñas.

   Por outra banda, permanece activo o incendio no municipio lucense da Fonsagrada, na parroquia de Monteseiro, iniciado ás 15,30 horas do martes, cunha superficie calcinada que aumenta até a 120 hectáreas.