O tráfico da AVE Ourense-Santiago deixará de controlalo Atocha e asumirao o novo centro de Adif en Galicia

   SANTIAGO DE COMPOSTELA, 31 Oct. (EUROPA PRESS) -

   O tráfico da liña de alta velocidade entre Ourense e Santiago deixará de xestionarse desde o cerebro operativo de Adif en Atocha e asumirao o novo --por renovado-- centro de regulación da circulación de Galicia, sito en Ourense.

   No actual centro de regulación da circulación galego, situado na antiga estación de San Francisco, en Ourense, traballan, simultaneamente, unha decena de persoas, segundo informan fontes do sector consultadas por Europa Press.

   Adif anunciou en setembro do ano pasado un investimento de 1,1 millóns de euros para modernizalo. Entre outras cosas, a través dun comunicado de prensa, avanzou que contará cun 'videowall' de 35,14 metros cadrados e "última tecnoloxía".

   O que comunicou entón o administrador ferroviario é que o novo centro de regulación da circulación, o cerebro operativo de Adif en Galicia, xestionará, "a distancia e en tempo real, a circulación de trens por toda a rede de Galicia: liñas do tres anchos de vía que suman 1.151 quilómetros".

   Isto significa que tamén levará o tramo de alta velocidade Ourense-Santiago, que na actualidade controla Atocha, desde o pasado mércores no foco das informacións polo accidentre entre unha AVE e un Iryo en Urda (Toledo), co resultado de polo menos 69 falecidos.

   "Tamén, como novidade respecto ao actual CRC, xestionará o tramo Ferrol-Ribadeo, da rede de ancho métrico. Todo o tramo en territorio galego da rede de ancho métrico", precisan fontes de Adif consultadas por Europa Press.

   O novo centro está en construción e as fontes do sector consultadas apuntan que "se trata de modernizar, unificar e mellorar as instalacións", porque "falta fai". "A compañía xa desprega o software" e "avanza na adecuación do edificio da antiga estación de San Francisco que acollerá a este punteiro centro", dicía Adif hai un ano, sen achegar prazos.

   No actual traballan 10 persoas "simultaneamente", que controlan o tráfico de toda a rede convencional de Galicia. "Agora controlar todo menos o novo Madrid-Ourense (que chega até Taboadela) e o Ourense-Santiago (novo)", explican as fontes consultadas.

   De feito, co novo centro haberá outro cambio: o límite de Taboadela vai modificarse e pasará, coa posta en servizo doutro tramo (actualmente en plataforma, sen vía), a Seixalbo, máis preto de Ourense. É dicir, desde Atocha levarán Madrid-Seixalbo en lugar de Madrid-Taboadela e o Taboadela-Seixalbo actual seguirá en servizo xestionado por Ourense.

"A CURVA DA BAÑEIRA"

   O sinistro de Urda produciuse tras a avaría do sistema 'LZB', cuxa caída parou aos trens. O 'LZB' é o equivalente ao 'ERTMS', ao que de feito está migrando a liña máis antiga da alta velocidade española, a que conecta Madrid e Sevilla.

   "No eixo atlántico, que hai 'ERTMS', non hai apenas incidencias, o 'ERTMS' funciona", destacan as fontes do sector. En Angrois (no tramo final da liña Ourense-Santiago, onde descarrilou un Alvia en 2013 causando 80 mortes) implantouse este sistema de control continuo da velocidade e freado automático en agosto de 2023, isto é, 10 anos despois. Existe conenso en que a súa presenza unha década atrás impediría a traxedia.

   Tras o accidente da Grandeira, a obra para implantar o 'ERTMS' foi adxudicada en 2015, coa previsión de que estivese lista en 2017. Este amplo prazo foi xustificado no seu momento pola complexidade técnica e polo feito de non parar a circulación dos trens salvo en contados días.

   De feito, durante a implantación houbo incidencias, pero as fontes consultadas advirten de que foron "as típicas", e introducen a idea de enxeñaría de "a curva da bañeira" das instalacións, segundo a cal "ao principio fallan moito, logo pouco... e logo outra vez moito (para cambialas)". Modificación que afronta o 'LZB' na liña Madrid-Sevilla, un sistema instalado en 1992 e "obsoleto", segundo a opinión de expertos.