A xestora do PSOE en Santiago convoca o proceso para elixir a nova dirección local, que se celebrará o día 21

   SANTIAGO DE COMPOSTELA, 5 Oct. (EUROPA PRESS) -

   A comisión xestora do PSOE de Santiago de Compostela, presidida por Diego Fernández López, decidiu na tarde deste xoves convocar o proceso para a elección da nova dirección local do partido na cidade. A asemblea na que se elixirá a nova dirección local terá lugar o sábado día 21 de outubro.

   Actualmente, o partido na capital galega está dirixido por esta xestora á que deu luz verde a dirección federal do partido o pasado mes de xuño, despois da renuncia do até entón secretario xeral, o que fose alcalde e actual senador, Xosé Sánchez Bugallo, após perder o bastón de mando.

   Conforme informou o Partido Socialista, o prazo para a presentación de propostas da nova executiva local estará aberto desde este xoves, día 5 de outubro, até o vindeiro mércores, día 11, ás 14,00 horas.

   A nova dirección local conformarase, como mínimo, de Secretaría Xeral, Secretaría de Organización e Secretaría de Política Municipal. Ademais, deberá contar con áreas de Acción Electoral, Administración e Formación, que poderán constituírse en secretarías de área independentes ou integrarse na de Organización. Tamén se recomenda a inclusión dunha secretaría de Igualdade.

   Segundo o establecido nos estatutos federais do PSOE e no seu regulamento, as comisións executivas municipais serán elixidas a través o sistema de voto maioritario, mediante voto individual directo e segredo da militancia, en listas pechadas, bloqueadas e paritarias.

   Nun comunicado, o presidente da xestora, Diego Fernández, sinalou que "112 días despois da constitución da xestora", esta "dá por concluído o seu labor durante esta etapa de transición" e decidiu "dar voz á militancia para elixir democraticamente unha nova dirección do partido e iniciar unha nova etapa de futuro" do PSOE de Santiago.