A Xunta aproba o Plan de Saúde Mental 2026-2030, dotado con 177 millóns e que sumará 357 novos profesionais

   SANTIAGO DE COMPOSTELA, 7 Sep. (EUROPA PRESS) -

   O Consello da Xunta aprobou este luns o Plan Estratéxico de Saúde Mental 2026-2030, dotado con 177 millóns de euros e que prevé a incorporación de 357 novos profesionais.

   Así o trasladou, na rolda de prensa posterior á reunión do Consello, o conselleiro de Sanidade, Antonio Gómez Caamaño, que destacou o "compromiso inequívoco" do goberno galego coa saúde mental, co obxectivo de avanzar cara a un modelo asistencial "máis accesible e coordinado, humanizado e innovador".

   O novo Plan contempla a contratación de 124 psiquiatras e psicólogos clínicos, e outros 233 profesionais (101 en Enfermaría de Saúde Mental, 68 técnicos en coidados auxiliares, 29 traballadores/as sociais, 21 terapeutas ocupacionais e 14 auxiliares administrativos). Ademais de mellorar a atención aos pacientes "máis vulnerables", como infancia, adolescencia ou persoas maiores, a nova estratexia pon tamén o foco no benestar no ámbito laboral.

   O titular de Sanidade, que lembrou que, após a pandemia de Covid "os problemas relacionados coa saúde mental incrementáronse notablemente", indicou que o obxectivo do novo plan é "reforzar o benestar psicosocial dos galegos e reducir o impacto dos trastornos mentais a través do desenvolvemento de medidas integrais que abordan prevención, detección, intervención temporal, continuidade de coidados, recuperación e inclusión comunitaria".

LIÑAS DE ACTUACIÓN

   Após o plan de 2020-2024, que supuxo a incorporación de 241 novos profesionais, agora o goberno galego "redobra esforzos" cun "orzamento histórico" para a nova estratexia, que se desenvolverá seguindo 6 liñas: trastorno mental grave, saúde mental na infancia e a adolescencia, saúde mental en idades avanzadas, trastorno mental común, novas unidades monográficas e trastornos adictivos.

   Estas liñas apóianse en catro eixos transversais, como son a humanización, sensibilización e loita contra o estigma; integración asistencial, optimización de recursos e sistemas de información; xestión de coñecemento, investigación e innovación; e resultados en saúde e indicadores.

   Aínda que Sanidade dará detalles do plan nas próximas horas, Gómez Caamaño avanzou que, entre as medidas recollidas, está a Rede de Psicoloxía Clínica de Atención Primaria, que xa se veu desenvolvendo nos últimos meses. Así, a Rede púxose en marcha este ano coa incorporación de 21 novos psicólogos e actualmente, hai 28 profesionais, que chegarán aos 50 ao finalizar o plan aprobado este luns.

   Igualmente, o documento para o período 2026-2030 contempla a integración no Sergas das Unidades Municipais de Atención ás Dependencias (UADs), xa anticipada ao pasado 1 de xaneiro. Tamén no Plan recóllese "un importante investimento" destinado a entidades que atenden a persoas con adiccións e patoloxía mental (8 millóns de euros para as convocatorias anuais de subvencións).

ACCIÓNS ESPECÍFICAS

   Por outra banda, mantense un programa "de éxito", como é o programa YAM de Prevención e Detección Precoz do Suicidio dirixido a adolescentes, no que xa participaron máis de 15.600 escolares.

   Respecto diso da atención aos máis novos, Gómez Caamaño explicou que o novo Plan de Saúde Mental prevé ampliar progresivamente a idade de atención á saúde mental infanto-xuvenil até os 18 anos, impulsar programas de transición á vida adulta, estender as unidades de rehabilitación psiquiátrica hospitalaria a todas as áreas sanitarias, crear novas unidades de hospitalización infanto-xuvenil (comezando pola área da Coruña), ou crear unha segunda unidade de referencia para os trastornos da conduta alimentaria de alta complexidade no sur de Galicia.

   Igualmente, promoveranse unidades de apoio ás persoas maiores e actuarase para previr a soidade non desexada, con programas específicos de psicogeriatría e de rehabilitación cognitiva; fortalecerase a capacidade diagnóstica e resolutiva da Atención Primaria para abordar trastornos comúns, como depresión ou ansiedade; expandirase a carteira de programas monográficos para trastornos como a conduta suicida, a depresión resistente e outras patoloxías complexas; etc.

   O plan prevé un investimento de 12 millóns de euros en obras para actuacións como a ampliación e adecuación de varios dispositivos asistenciais. Tamén contempla estender a todas as áreas as unidades de rehabilitación psiquiátrica, ampliar os programas de hospitalización a domicilio e os equipos de coidados de orientación comunitaria; e aumentará até os 27,5 millóns o orzamento para prazas en residencias especializadas e pisos para pacientes de saúde mental.

 "COMPROMISO INEQUÍVOCO"

   O conselleiro puxo en valor o "compromiso inequívoco" da Xunta coa saúde mental e coa "loita contra o estigma" destas enfermidades, como se demostra con este plan que "redobra recursos económicos e recursos humanos". Todo iso co fin de consolidar, até 2030, un sistema de saúde mental "máis accesible, humano e innovador".

   Finalmente, tamén reivindicou a acción do goberno galego en materia de benestar laboral e explicou que quedarán plasmadas no novo plan "a intensar labor dos profesionais de saúde mental e as súas achegas para mellorar a situación no ámbito do emprego", co fin de mellorar a prevención o benestar laboral e a reincorporación "saudable" ao traballo.