O Consello da Competencia colaborará coa Avogacía do Estado para impugnar normas da Xunta lesivas na materia

SANTIAGO DE COMPOSTELA, 29 Abr. (EUROPA PRESS) -

O Consello Galego da Competencia prepara a sinatura dun convenio coa Avogacía do Estado para aplicar unha capacidade que, polo momento, existe "só no plano teórico" e que permite impugnar actos administrativos ou disposicións autonómicas con rango inferior á lei que sexan consideradas contrarias á libre competencia.

O presidente do Consello --ente de recente creación, tras a integración do Servizo Galego da Competencia e o Tribunal Galego da Competencia--, Francisco Hernández, compareceu este venres ante a Comisión de Economía, Facenda e Orzamentos del Parlamento de Galicia, acompañado de dous vogais, Alfonso Vez Pazos e Fernando García Cachafeiro, para explicar as súas propostas para o mandato, que durará seis anos sen reelección, e como trámite previo ao seu nomeamento efectivo.

Hernández explicou na súa intervención que está "moi avanzado" un convenio co Instituto Galego de Consumo (IGC), que permitiría que inspectores destes organismos se apoien nas súas tarefas, e que traballa tamén nun acordo coa Avogacía do Estado.

A administración pública, argumentou, "non pode estar á marxe" das normas da libre competencia, de modo que Hernández apostou por activar "unha competencia importante pero que, polo momento, solo existe no plano teórico" e que é a posibilidade de impugnar disposicións da propia Xunta que considere contrarias ás normas na materia.

Así, expuxo que esta capacidade non se pode aplicar pola "imposibilidade de usar os servizos xurídicos da Xunta para impugnar disposicións da propia administración galega", de aí que a solución pase por un acordo coa Avogacía do Estado para que interveña nestes casos.

Ademais, o presidente do consello indicou que está preparado un plan bienal de actuación que se centra na "defensa dos consumidores" e fomentar a libre competencia, que entende como "parte da solución" á crise.

Tamén apuntou que xa ten previstas as súas dúas primeiras investigacións de oficio --fíxase emprender dous cada ano por iniciativa propia--, que estudarán a repartición do mercado do leite (xa iniciada) e o pacto de prezos da gasolina.

O responsable do conselo destacou que a non aplicación de boas prácticas de competencia na contratación pública pode chegar a encarecer un 30% os contratos. No seu mandato, afirmou, traballará con "independencia" e pediu aos tres grupos parlamentarios que acheguen "opinións" ao organismo, tras constatar a "sintonía" neste ámbito. Tamén avisou de que loitará para aumentar os seus medios, pois aínda que sexan máis agora "segue sendo un persoal claramente escaso".

ARBITRAXE E AUTONOMÍA

O vogal do Consello Alfonso Vez Pazos apostou tamén por que se inclúa entre as capacidades deste órgano a resolución de conflitos mediante a arbitraxe e afirmou que, malia a crise, "é conveniente facer un esforzo para que se poida encargar de máis asuntos e máis rápido".

Pola súa banda, o outro vogal, Fernando García Cachafeiro, incidiu na necesidade de "descentralizar a aplicación da Lei de Defensa da Competencia", de modo que Galicia poida intervir en asuntos mesmo se non afectan exclusivamente ao seu territorio ou tecido empresarial.

ENERXÍA, FINANZAS E TELECOMUNICACIÓNS

Pola súa parte, os voceiros dos grupos parlamentarios do PSdeG e o BNG en materia de economía, María José Caride e Fernando Blanco, respectivamente, coincidiron na necesidade de vixiar as operacións en sectores como a enerxía, os servizos financeiros e bancarios e as telecomunicacións, un punto no que concordaron os responsables do conselo, que apuntaron que xa teñen denuncias destas actividades.

En concreto, Blanco pediu que se promova que a sociedade coñeza en que consiste a libre competencia e avalou a necesidade dun "maior nivel competencial". O deputado nacionalista destacou a "importancia" que ten "a vixilancia dos mercados, que non son neutros" e animou aos integrantes do conselo para acometer o "traballo abundante" que teñen por diante.

A representante socialista chamou a atención acerca de que a economía encuberta "non deixa de ser tamén un problema de competencia" e animou a investigar tamén esta área. En calquera caso, tras destacar a profesionalidade que presupón os vogais e o presidente de Competencia, manifestou "botar de menos" un perfil económico, pois os integrantes son xuristas. Hernández indicou que buscan un último vogal ao que pedirán precisamente competencias en economía.

O voceiro do PPdeG, Pedro Puy, subliñou que as reformas no servizo de defensa da competencia en Galicia dan "máis capacidade de traballo e competencia", co que "se reforzan as administracións". Así, coincidiu en que é "fundamental reforzar a competencia dos organismos autonómicos" e manifestou a súa confianza en que o consello desenvolverá os seus labores "con solvencia técnica, profesionalidade e independencia".