SANTIAGO DE COMPOSTELA, 21 Abr. (EUROPA PRESS) -
O Consello de Goberno da Universidade de Santiago (USC) reunirase o vindeiro luns día 24 para tratar, entre outros asuntos, a convocatoria de prazas do Servizo Universitario de Residencias (SUR) para este verán e para o vindeiro curso académico 2006-2007.
Na xuntanza, que comezará a partir das 10.00 horas no Salón Reitoral do Colexio de San Xerome, tratarase ademais o protocolo para a regulación das validacións e adaptacións, a extinción das bolsas de perfeccionamento investigador, a modificación do plan de estudos do Gran Diploma de Xestión e Dirección de Empresas Hostaleiras, a convocatoria de bolsas de comedor do SUR para o vindeiro curso, e as tarifas da Escola Infantil 'Breogán'.
Outros asuntos que se tratarán son a designación dos membros da Comisión de Actividades e Servizos de I+D, prazas de profesorado, a permuta de destino entre funcionarios do corpo de profesores titulares de universidades, a prórroga de Comisións de Servizo, ou a ratificación dos regulamentos de réxime interno da Facultade de Xeografía e Historia, da Escola Universitaria de Relacións Laborais e do Departamento de Filoloxía Alemá.
A orde do día desta xuntanza do Consello de Goberno da USC complétase co debate sobre convenios, asuntos económicos e a memoria de ano sabático do curso 2004-2005.
