SANTIAGO DE COMPOSTELA, 30 May. (EUROPA PRESS) -
Dous equipos da Universidade de Santiago (USC) resultaron premiados na terceira convocatoria dos galardóns que a Fundación Vital Dent adica á investigación en odontoestomatoloxía e que, cunha suma de 85.000 euros repartidos en tres categorías, supón a maior dotación económica a un premio de investigación destas características en Europa.
O mellor traballo de investigación clínica, dotado con 25.000 euros, correspondeu a un equipo da USC dirixido por Pedro Diz Dios e composto por Tomás Carmona, M. Álvarez Fernández, J. Limeres Posse, J. Fernández Feijoo, e J. Medina Hernández. A Fundación premiou o seu traballo 'Profilaxe antibiótica da endocardite bacteriana de orixe oral: Eficacia na prevención de bacteriemias post-exodoncia'.
Tamén á USC pertence o grupo que acadou o premio á Mellor Revisión Bibliográfica, dotada con 10.000 euros. Os autores do traballo premiado 'Os trastornos musculoesqueléticos no exercicio profesional da odontoloxía' son Rosendo Bugarín González, Pablo Galego Feal, Teresa Queiro Verdes, Abel García García e Pedro Rivas Lombardero.
O premio na categoría de Mellor traballo de Investigación Básica, dotado con 50.000 euros, correspondeulle á Universidade Politécnica de Catalunya polo proxecto 'Novos implantes osteoinductivos con rápida osteointegración: Estudo in vitro e in vivo'.
O xurado do Premio Fundación Vital Dent á Investigación en Odontoestomatoloxía, cuxa cerimonia de entrega terá lugar o 30 de xuño, estivo presidido polo catedrático de Patoloxía Médico-Cirúrxica Bucal da Universidade do País Vasco, Joseba Santamaría. Os membros do mesmo destacaron o "alto nivel" dos traballos presentados, o que reflicte o crecente interese dos novos odontólogos pola investigación.
