SANTIAGO DE COMPOSTELA, 28 Ene. (EUROPA PRESS) -
A Consellería de Educación e Ordenación Universitaria vai desenvolver un programa que permitirá aos escolares galegos do primeiro ciclo de primaria coñecer os instrumentos de orquestra con menor demanda nos conservatorios de música.
Esta iniciativa tenta dar resposta á situación detectada nos últimos anos na rede de conservatorios profesionais de música das principais cidades de Galicia, onde non se chegan a cubrir todas as prazas que se ofertan para iniciar estudos dalgúns instrumentos orquestrais, especialmente os de vento e algúns de corda. Así, pese a ter estes unha boa saída no mundo laboral, os alumnos de idades temperás decántanse por instrumentos máis populares como a guitarra ou o piano.
Por todo isto, a Administración educativa galega considera preciso proporcionar ao alumnado do primeiro ciclo de primaria unha fórmula que lles permita o coñecemento dos instrumentos que compoñen a orquestra, de xeito que, ademais, os nenos poidan estar en condicións, chegado o momento do ingreso no conservatorio, de escoller un instrumento determinado partindo do mellor coñecemento do mesmo.
A campaña de promoción dos instrumentos de baixa demanda entre o alumnado galego comprenderá dous tipos de actividades que se desenvolverán nos colexios situados na área de influencia de cada conservatorio profesional que o soliciten. Así, levarase a cabo unha presentación dunha unidade didáctica sobre os instrumentos de orquestra aos alumnos do centro por parte do profesorado de música do mesmo.
Ademais, un equipo de profesores e alumnos do conservatorio visitarán aos nenos para facerlles unha demostración dos instrumentos escollidos. Esta actividade poderase realizar nos propios conservatorios no caso de que os alumnos do centro poidan desprazarse.
Andalucía
