A Fundación Manuel Ventura Figueroa entrega 15 bolsas a alumnos universitarios por valor de case 26.000 euros

SANTIAGO DE COMPOSTELA 14 Feb. (EUROPA PRESS) -

A Fundación Manuel Ventura Figueroa entregou hoxe a 15 alumnos que cursan estudos universitarios de 1º, 2º, e 3º ciclo ou realizan teses de doutoramento neste curso 2005-2006 as bolsas de estudio pertinentes para as que a institución destinou preto de 26.000 euros.

O acto, celebrado hoxe no Museo Pedagóxico de Galicia (Mupega), en Santiago, estivo presidido pola conselleira de Educación, Laura Sánchez Piñón, e contou coa asistencia do secretario xeral do departamento educativo autonómico, Benito Roberto Fernández Rodríguez; e os membros desta fundación, Adela J. Rey Abilleira; Francisco Javier Jorge Barreiro, secretario do padroado da Fundación; e Dositeo Rodríguez, xuíz protector da mesma.

Esta entidade concedeu doce bolsas de 1º e 2º ciclo, unha para alumnos que cursan estudos de 3º ciclo e dúas para os que están a a realizar teses de doutoramento. O importe investido por esta fundación para a financiamento das axudas ascende a un total de 25.849 euros.

Os beneficiarios destas axudas son todos parentes do fundador, debidamente clasificados como tales, que resultaron seleccionados polo Padroado. Neste senso, a comisión de selección --composta polos membros do Padroado-- valorou a situación económica dos solicitantes, a súa traxectoria académica, e a proximidade no grao de parentesco co fundador.

A Fundación Manuel Ventura Figueroa foi instituída en 1784 polos testamenteiros de Manuel Ventura Figueroa, patriarca das Indias, arcebispo de Laodicea e gobernador do Consello e Cámara de Castela, co obxecto, entre outros, de proporcionar axudas económicas para realizar estudos de toda clase destinadas aos seus parentes.