SANTIAGO DE COMPOSTELA, 1 Jun. (EUROPA PRESS) -
Santiago Centro, agrupación comercial da capital galega, organiza para hoxe pola noite un desfile de moda na Praza Roxa, no que se presentarán as tendencias de primavera-verán en roupa, calzado e complemento e que quere ser un espectáculo para dinamizar o Ensanche.
'Moda a Pé de Rúa' é unha nova iniciativa do comercio do Ensanche compostelán que consiste nun desfile de moda ao aire libre, co que se tenta levar a un espazo diferente este tipo de eventos, achegando as tendencias á rúa.
Deste xeito, a partir das 21.30 horas a Praza Roxa transformarase por unhas horas nunha pasarela coa que a organización tenta promover ao comercio asociado, en especial os sectores de baño, téxtil, calzado e complementos, así como participar activamente na dinamización do Ensanche de Santiago.
O desfile desenvolverase en 30 metros de pasarela e contará con 110.000 watios de luz e son. A montaxe deste espectáculo, ao que se terá acceso directo desde todas as rúas que converxen na Praza Roxa, conta cunha decoración acorde coa tempada primavera-verán.
Está prevista a participación de preto de 30 comercios asociados a Santiago Centro e a organización programa dous pases por cada establecemento para que amosen o máis representativo de cada un. A axencia New Models xestiona os modelos do desfile, oito homes e oito mulleres. Ademais, desfilarán como aficionados sete nenos de Santiago. Este acto, que chega á súa segunda edición, conta co patrocinio da Consellería de Innovación e Industria, do Concello de Santiago e de La Caixa; así como coa colaboración da Cámara de Comercio, de Caeiro Renault, de Fotosistema, da Cadena Ser e da Floristería Adria de Ames.
