A CORUÑA, 2 May. (EUROPA PRESS) -
O Consello de Goberno da Universidade da Coruña deu hoxe, nunha xuntanza na sede da Maestranza, os primeiros pasos do desenvolvemento do programa de promoción do persoal docente e investigador habilitado, aprobado por este mesmo organismo o pasado mes de xaneiro Así, na sesión de hoxe deuse o visto bo á creación de tres prazas de catedrático universitario habilitado.
Esta iniciativa está enmarcada dentro dun plano xeral de estabilización do profesorado, que persegue aumentar a calidade académica da Universidade. O equipo de goberno aboga, neste senso, por un programa de promoción docente que non estea limitado no tempo para ofrecer a suficiente confianza como para que os profesores desenvolvan eficazmente a súa actividade docente e investigadora.
Por outra banda, o reitor, José María Barja, informou aos asistentes do nomeamento de Felipa Jove como nova presidenta do Consello Social da Universidade da Coruña. Entre outros temas que se aprobaron na sesión de hoxe figuran os regulamentos internos dos departamentos de Bioloxía Animal, Bioloxía Vexetal e Ecoloxía; Economía Aplicada II; Filosofía e Métodos de Investigación en Educación; Fisioterapia, e Psicoloxía.
