El Conceyu de Xixón diz que la financiación d'El Musel "ta garantizada" y IU diz que la UE pon como escusa la denuncia

XIXÓN, 03 d'Abril (EUROPA PRESS)

El conceyal de Coordinación Alministrativa y Facienda del Ayuntamientu de Xixón, Santiago Martínez Argüelles, afirmó güei en rueda prensa en sede consistorial que la financiación pa les obres d'ampliación del puertu d'El Musel "ta garantizada". Pela so parte, IU diz que la UE usa la denuncia de Los Verdes como escusa pa nun conceder el dineru.

Argüelles pronuncióse nesti sen tres conocese pelos medios de comunicación un informe de la Unión Euroepa que pue resultar desfavorable pa que la obra portuaria reciba fondos europeos. "Nun hai riesgu de paralización nin detención", aseguró, indicando que pel momentu "nun se sabe l'algame" de dichu informe, que tovía nun se conoz de manera oficial nin correspuenden al órganu que tien la competencia n'última instancia sobre l'asuntu.

"En tou casu, la continuidá d'El Musel ta garantizada porque ta financiáu polos Presupuestos del Estáu", insistió. Nesti sen, a entrugues de los periodistes sobre la situación pa próximos exercicios, el conceyal señaló que "nel futuru tamién" van tense en cuenta eses garantíes.

Amás, l'edil apuntó que Puertos del Estáu podía designar a la obra de fondos de cohesión, y señaló que va ser l'organismu nacional el que faiga la so "composición interna" sobre'l tema, dao que "garantiza la realización de la obra".

"ESCUSA"

Pela so parte, el conceyal de Cooperación Internacional del Ayuntamientu de Xixón, Jesús Montes Estrada (IU), apuntó güei que la Unión Europea uitliza la denuncia de Los Verdes "como escusa" pa nun conceder la financiación pa l'amplaición del puertu d'El Musel. Asina, pal edil, la UE "ta llibrándose" nesi aspeutu. "Nun ye un tema fundamental la denuncia de Los Verdes", afirmó.

"Nun quiero creer qu'una carta, denuncia o alegación, por mui fundamentada que tea, qu'unvía un grupu d'una ciudá d'una esquina d'Europa seya l'elementu fundamental pa frenar una ampliación portuaria", dixo apuntando que "si esa denuncia animare a la UE a la paralización de la financiación del puertu, ¿cómo nun fizo nenguna entrugu al Ayuntamientu de Xixón?". "Inoro si se ficieron entrugues al Gobiernu d'Asturies o si na so inorancia saben cuál ye'l problema que tán asitiando equí", añadió.

El conceyal calcó en que "al final la obra va acabase, tien de ser asina, y la diferencia ta en si se financia con fondos europeos o españoles", dixo. Asina, remarcó que si dempués hai qu'analizar responsabilidaes, que se faiga pero caltién qu'éstes deben aldericase "tres l'acabación de la obra".

Asina, lo dixo a los medios de comunicación tres la receición a los participantes nes Xornaes Internacionales '50 años de Revelución Cubana', organizada por Ospaaal, y a la qu'asistieron embaxadores de Cuba, Bolivia y Venezuela, y representantes saharauis, xunto col conceyal de Cultura de Xixón, Justo Vilabrille; la conseyera de Bienestar Social, Vivienda y Cooperación del Principáu, Noemí Martín; el director xeneral del Cooperación Internacional, Rafael Palacios; y l'eurodiputáu d'IU, Willy Meyer, ente otros.

Y ye que pa Montes Estrada les noticies que salen güei sobre la posibilidá d'un frenazu a la inversión necesaria p'acabar la obra d'El Musel son "malísimes" pa la ciudá y p'Asturies. "L'amplicación portuaria actual ye una propuesta que malpenes tien dalguna alegación y busca un puntu d'equilibriu col conxuntu de la ciudá", argumentó. Poro, apuntó que n'Europa "nun anden garrando'l rábanu peles fueyes y asuman la responsabilidá que tienen con un país como'l nuesu y con una Asturies qu'agora tán atravesando una crisis mui seria".