El PP acepta la enmienda del PSOE a la moción sobre la especialidá del asturianu, que la torna nuna solicitú d'estudiu

   UVIÉU, 12 de Xunu (EUROPA PRESS)

   El PP aceptó güei les enmiendes pa la so proposición non de llei referente al asturianu na que pidía al Gobiernu del Estáu que reconoza xurídicamente la especialidá pal profesoráu qu'imparte la enseñanza. La iniciativa aprobóse por unanimidá, pero pasando de ser una exixencia a una solicitú d'estudiu de la posibilidá.

   Sin embargu, diose la circunstancia nel Plenu de güei de qu'IU-BA-Verdes ofreció los sos votos pa sacar alantre la proposoción, hasta sin necesidá d'incluyir les enmiendes firmaes por PSOE y IU, que "desvituaríen" la propuesta inicial, según el diputáu d'IU-BA-Verdes, Francisco Javier García Valledor. A lo último, el PP sí aceptó les enmiendes. El diputáu d'IU-BA-Verdes llamó "caradures" y "engañabobos" a los populares, y los acusó de votar a la escontra de lo qu'ellos mesmos proponíen.

   La proposición inicial del PP, aldericada nel Plenu de la Xunta Xeneral del Principáu d'Asturies (XXPA), encamentaba al Gobiernu rexonal qu'estableciere un acuerdu col Ministeriu d'Educación y Ciencia pol que se reconociere xurídicamente y a tolos efeutos la especialidá d'asturianu pal profesoráu qu'imparte l'asignatura.

   Pero les enmiendes almitíes güei pol PP modificaron el testu de la proposición cambiando'l términu "establecer" pola redaición "desarrollar l'estudiu pa evaluar la posibilidá de". Amás, tamién s'eliminó'l requisitu d'establecer l'acuerdu, de manera que la iniciativa pide "solicitar, si fuere posible, al Ministeriu d'Educación y Ciencia la creación d'esta especialidá".

   A pesar de que podíen sacar alantre la so iniciativa sin esos cambios, el diputáu del PP, Emilio Rodríguez Cueva, dixo qu'almitía les enmiendes p'algamar llegar a acuerdos que meyoren les condiciones de los profesores. Na so esposición incial, Rodríguez dixo que'l profesoráu d'Asturianu sigue sin contar coles mesmes garantíes llaborales y profesionales que'l restu de los docentes.

   Pero'l diputáu d'IU-BA-Verdes replicó que la posición del PP foi simplemente "oportunista" y recordó que na ponencia de la reforma del Estatutu, el PP, xunto col PSOE, s'opunxo frontalmente a la cooficialidá, dalgo que diba solucionar la situación de "precariedá" de la llingua asturiana, incluyíu'l problema de los profesores.

   Asina, Valledor ofreció l'apoyu del so grupu "sin condiciones" al testu del PP, teniendo en cuenta amás qu'hubo novedaes recientes, como una sentencia del Tribunal Supremu referente a les plantiyes funcionales y la decisión de la Universidá d'Uviéu de formar profesores d'esta materia. "Dase l'absurdu de que la Universidá forma especialistes pa una especialidá que nun existe", apuntó.

   Reprochó al PP la so actitú por "recular" na so iniciativa incial, dexando la situación como taba, dao que'l testu enmendáu nun supón nengún avance en rellación al acuerdu de Gobiernu ente PSOE y IU-BA-Verdes. "Van votar a la escontra de lo que presentaron", acabó espetando Valledor a les files del PP.

   Les pallabres de Valledor sorprendieron al diputáu del PSOE, Alfonso Rey, que lu calificó de "ópera del absurdu", porque se dedicare a defender un testu del PP, renunciando a unes enmiendes que tenía firmaes. Afirmó que la llei en materia de la llingua asturiana se ta cumpliendo "escrupulosamente" n'Asturies, y dixo que la creación d'especialidaes docentes correspuende al Gobiernu del Estáu y non a les comunidaes. Alfonso Rey, dixo amás que'l so partíu ta dispuestu a discutir temes llaborales del profesoráu.