Foto: CARBALLO INTERPLAY
SANTIAGO DE COMPOSTEla, 27 Abr. (EUROPA PRESS) -
A I edición do Carballo Interplay, o primeiro festival de webseries que se celebra en España, premiou ao serial 'Les coses grans' (Barcelona) como mellor traballo en imaxe real e a 'Ventura Time' (Barcelona) co galardón de obra de animación. Pola súa banda, 'Poetarras' foi recoñecido como a mellor webserie en galego, nunha categoría na que 'Palabras secretas' recibiu unha mención especial.
Deste modo, o I Carballo Interplay chega este domingo ao seu fin tras catro días nos 35 webseries competiron nunha edición na que o mellor guión foi para 'Entre pipas', con mención especial para 'lavida.es'. Os galegos Luis Zahera e Xúlio Abonjo obtiveron o galardón a mellor actor (ex aequo) polos seus papeis en 'Entre pipas'; mentres que a mellor actriz foi Mar Ulldemolins por 'Les coses grans'.
Ademais, o público outorgou o seu galardón a 'Les coses grans', mentres que 'Cálico electrónico' levouse unha mención especial do xurado a mellor serie de animación. Entre todos os galardoados se repartiron 5.200 euros, os cales recibiron un premio deseñado polo artista plástico David Méndez.
'Poetarras', a mellor produción en galego, é unha webserie de sketches dun "colectivo arterrorístico" creada polos galegos Manuel Gago, Rubén Lino Mandado e Daniel Vilaverde.
O xurado deste festival, que organiza a concellaría de Promoción Económica da capital bergantiñana, estivo formado polo director e guionista de 'Malvivindo', David Saínz; a directora de Produción de Diffferent Entertainment SL, Teresa Segura; o debuxante Alberto Vázquez; a guionista e realizadora Lidia Fraga; o responsable do 'ReTwittMad especial webseries', Félix Garrido; e o fotógrafo e cámara F. Arnoso 'Pixi'.
Así mesmo, nesta primeira edición presentouse unha webserie realizada polos participantes nun taller posto en marcha polo festival ao longo do mes de marzo en Carballo. Impartido por Javi Camino, Enrique Lojo e Daniel Vilaverde, ademais de Santiago Díaz, Under Varela e Luis E. Froiz, contou coa participación dunha vintena de novos do municipio que crearon 'Toñito, ti é especial', unha peza de cinco capítulos.
Este domingo, a gala de peche deste festival --no que tamén houbo concertos, mesas redondas e diversos talleres-- corre a cargo das protagonistas de 'Anxélica e Roberta'.
