SANTIAGO DE COMPOSTELA, 21 Feb. (EUROPA PRESS) -
Centros e entidades de toda Galicia conmemoran o Día Internacional da Lingua Materna con actos de lectura, actividades e outras iniciativas que teñen o obxectivo de difundir e celebrar das vantaxes de posuír un idioma propio. A Unesco escolleu 'o libro, eixe da educación en lingua materna' como lema para esta conmemoración do 21 de febreiro, instituído por esta entidade no ano 1999.
O Concello de Santiago de Compostela celebrou esta xornada cun acto de lectura dun texto institucional no CEIP López Ferreiro, que contou coa participación da concelleira de Educación, Rebeca Domínguez, que repartiu libros a cada un dos alumnos.
En declaracións aos medios, a edil destacou a importancia de "concienciar aos mozos" da vantaxe de posuír unha lingua propia, que "sempre suma e nunca resta", e sobre todo da necesidade de coidar e "poñer en valor" este idioma, "que os acompaña dende sempre e para sempre".
O director do centro, Lois Trigo, destacou que a comunidade educativa está "bastante concienciada" respecto á lingua galega, e engadiu que "todo o que se faga" neste campo é "necesario e imprescindible", sobre todo ao tratarse dunha "lingua minorizada".
Posteriormente, alumnos do centro fixeron lectura dunha declaración na que reivindican a diversidade lingüística e cultural como "unha vantaxe" e un símbolo de "riqueza" que permite avanzar no desenvolvemento dos pobos.
Así mesmo, destacaron o idioma tanto como un dereito como a súa "responsabilidade" e "deber", co que se expresan pensamentos e sentimentos, que se sitúa entre as 200 linguas que máis se falan e entre as 50 máis usadas en Internet.
REDE DE DINAMIZACIÓN LINGÜÍSTICA
O acto central da conmemoración celebrouse na Escola Infantil Municipal de Arteixo, coa lectura dunha declaración aprobada polas máis de 130 entidades que conforman a Rede de Dinamización Lingüística na que participaron tanto o secretario xeral de Política Lingüística, Valentín García, como o rexedor local.
"A contribución de Galicia a esa diversidade lingüística é o seu idioma propio, a lingua orixinaria e exclusiva desta terra, portadora dunha cultura particular: o galego", destaca o texto, ademais de compartir a "visión positiva" da Unesco respecto á pluralidade de idiomas como "fonte de riqueza" e "garantía de desenvolvemento dos pobos".
