Feijóo agarda aprobar o recorte de diputados no primeiro semestre de 2014

Foto: EUROPA PRESS

   VIGO, 16 Nov. (EUROPA PRESS) -

   O presidente da Xunta, Alberto Núñez Feijóo, ratificou este sábado a súa intención de que a proposta de reforma electoral para reducir de 75 a 61 os deputados do Parlamento galego sexa rexistrada no Pazo do Hórreo antes de que remate decembro, de forma que se poida aprobar no seguinte período de sesións, que finaliza en xuño de 2014.

   "Quédannos catro ou cinco semanas para presentar o proxecto e no seguinte período de sesións aprobalo para cumprir o compromiso cos electores que nos enviaron a mensaxe de que queren unha autonomía solvente, acorde coa situación das familias e un Parlamento na franxa baixa que recolle o Estatuto, con 61 deputados,", concretou Feijóo, un día despois de abordar este asunto co secretario xeral do PSdeG, José Ramón Gómez Besteiro.

   En declaracións aos medios durante unha visita ao pavillón polideportivo de Baiona (Pontevedra), o presidente celebrou que Besteiro "entenda" que a reforma para reducir o número de parlamentarios no Pazo do Hórreo non é unha cuestión na que non pode "dar marcha atrás", dado que é "un mandato dos electores". E é que, ao seu xuízo, unha aproximación entre PSdeG e PP sumaría que o resto da oposición se sumase a un posible acordo.

   Non en van, defendeu que os Gobernos teñen que entender o que os electores lles trasladan "a través das urnas" e se reafirmou en que hai "un mandato" para reducir deputados. Mandato que, reiterou, gustaríalle cumprir "co maior acordo posible".

   Dito isto, esgrimiu que, ao seu entender, abordar a redución de deputados "é obrigado" non só para o seu Goberno senón "para todos os partidos" dado que "saíu directamente das urnas".

AVANZAR CARA AO CONSENSO

   Así as cousas, o presidente galego manifestou o seu desexo de que poder avanzar co PSOE no "único" -- remarcou -- que se pode negociar neste momento: o mínimo de deputados por provincias. O obxectivo último, reafirmouse, será reducir o número de escanos da Cámara de 75 a 61.

   Neste sentido, mostrouse convencido de que se os dous partidos maioritarios en Galicia son capaces de "avanzar conxuntamente" se "facilitará" que o resto de partidos que conforman o arco parlamentario galego "se"poidan achegar e introducir nese acordo".

   "Eu vouno intentar", prometeu o presidente, antes de advertir, non obstante, que "non pode facer outra cousa" que presentar antes de que remate o actual período de sesións -- é dicir, antes de fin de ano -- a proposta, co reto de que sexa aprobada no primeiro semestre do ano.