El 72% d'españoles defende una negociación qu'evite la independencia de Cataluña, según la UOC

El 80% apoya'l derechu d'autodetermín pero solo'l 40% quierlu pa Cataluña

MADRID, 26 de Febreru (EUROPA PRESS)

El 72,4 por cientu d'españoles non catalanes ye partidariu d'una negociación ente los gobiernos estatal y autónomicu pa evitar la separación ente España y Cataluña, mientres que'l 51,6% aceptaría la voluntá del pueblu catalán, según l'estudiu del 'Diagnósticu de percepciones Cataluña-España', realizáu pola Universitat Oberta de Cataluña (UOC) y presentáu güei en Madrid.

El director del estudiu y profesor d'Artes y Humanidaes de la UOC, Miquel Strubell, resaltó que l'informe pretende visualizar dellos aspectos del ampliu debate del encaxe de Cataluña nel Estáu de les autonomíes.

El diagnósticu inclúi dos estudios demoscópicos (realizáronse 2.614 entrevistes en Cataluña y 1.883 n'España), ellaboraos de forma separada en Cataluña y nel restu del Estáu respectivamente. Ficiéronse cuestionarios específicos pa caún d'ellos, pa sacar conclusiones sobre ambos escenarios.

"L'estudiu constata cierta resistencia a almitir los símbolos, la llingua y les representaciones de Cataluña como nación. Malpenes se cuestionen, sicasí, les normes de llibertá y de civismu que tienen que mandar cualquier procesu de cambiu o evolución de les relaciones ente Cataluña y España", según el testu.

L'informe indica que'l 80,2 por cientu de los encuestaos del restu d'España opina que los pueblos del mundu tienen derechu a l'autodetermín. "Sicasí, namás un 40,1% opina lo mesmo pa Cataluña, y un 53,6 por cientu sostién que los catalanes nun tienen derechu a escoyer llibremente'l so autodetermín", esplicó Strubell.

Sobre la posibilidá de que Cataluña entame un procesu pa celebrar un referéndu d'autodetermín, el 60 por cientu d'españoles piensa que habría incidentes violentos, anque'l 89 por cientu nun los consideraría xustificaos.

DATOS DE CATALUÑA

El 19,7 por cientu de los encuestaos catalanes opina que'l Gobiernu actúa correctamente col Estatut, mientres qu'un 61,1 por cientu cree que non. Sobre'l nivel d'autonomía catalán, un 40 por cientu velu suficiente, mientres qu'un residual 4 por cientu considéralu escesivu, dixo Strubell.

Más de la metá de los catalanes tán dafechu a favor de que Cataluña puea convocar un referéndum d'autodetermín; y el 58,5 por cientu, de que'l catalán puea ser llingua oficial y de trabayu na UE.

Según Strubell, son pocos --15 por cientu-- los catalanes qu'afirmen que se-yos trata peor cuando viaxen per España, mientres que la enorme mayoría consideren que se-yos trata igual o meyor.