UVIÉU, 23 Oct. (EUROPA PRESS) -
Un 86,1% de la mocedá apoya que l'asturianu sía una llingua oficial y namás un 12,2% ta en contra, lo que muestra que la mocedá ye más favorable al usu y pervivencia d'esta llingua, según se recueye nun estudiu de l'Academia de la Llingua Asturiana (ALLA) y el Conseyu de la Mocedá del Principáu d'Asturies (CMPA).
Esti ye ún de los datos más reseñables que se pue ver en 'Los jóvenes y la lengua asturiana. Investigación sobre las opiniones de la juventud sobre la lengua asturiana', un estudiu sociollingüísticu dirixíu por Isabel Hevia que muestra les opiniones y actitúes llingüístiques de la población d'ente 16 y 29 años y que se presentó esti martes n'Uviéu.
Según esti estudiu, un 63% de los mozos asturianos considera que n'Asturies existen dos llingües propies, l'asturianu y el castellanu, mentes qu'un 22,1% considera que la llingua propia ye namás l'asturianu.
Otra manera, el 93% considera que l'asturianu ye una llingua como'l restu d'idiomes rexonales d'España. Amás, un 94,2% piensa que tien que protexese al igual que catalán, gallegu o vascu. En rellación col conocimientu y usu del idioma, un 94,2% de los mozos entiéndenlo -ye de reseñar qu'un 49,8% asistió a clases d'asturianu-.
Con too, namás la metá de la mocedá asturianu usa esti idioma nes sos rellaciones sociales, mentes qu'a la hora de dirixise a otres persones en contestos públicos, la tendencia mayoritaria --un 73,8%-- ye l'empléu de la llingua castellana.
Per otru llau, pa escribir en redes sociales, corréu o Whatsapp, hai un 33,9% qu'usa les dos llingües y un 3,6% namás n'asturianu. Otra manera, alredor del 60% diz nun tener nengún problema pa siguir los programes n'asturianu de RTPA y lleguen al 82% los que consideren que los medios públicos tendríen que tener una ufierta mayor de conteníos nesti idioma.
Sobre la presencia del idioma nel sistema educativu, ocho de cada diez mozos ta a favor de que la llingua tea presente y un 77,2% considera que l'asturianu tendría que ser, xunto col castellanu, llingua vehicular nes escueles.
Según se pue ver nel estudiu, los datos muestren que la mocedá asturiano nun supón nengún escayu pa plantear polítiques de normalización llingüística "qu'iguale l'asturianu al restu de llingües oficiales del Estáu". "Ye más, son un factor de dinamización, de xustificación y hasta d'esixencia d'esa política cultural", indiquen.
