Alfredo Sáenz renuncia como conseyeru delegáu del Santander

MADRID, 29 d'Abril (EUROPA PRESS)

Alfredo Sáenz Abad comunicó al conseyu d'alministración del bancu la renuncia voluntariu a los sos cargos de vicepresidente y conseyeru delegáu de la entidá, dexando amás de formar parte del conseyu, informó'l Santander.

El máximu órganu de gobiernu de la entidá acordó nomar nuevu conseyeru delegáu a Javier Marín Romano, que s'incorporó al grupu Santander en 1991 y qu'hasta la fecha yera director xeneral del bancu y responsable de la división global de Seguros, Xestión d'Activos y Banca Privada.

Alfredo Sáenz incorporóse al Grupu Santander en 1994 con ocasión de l'alquisición de Banesto, desempeñando'l cargu de presidente de dicha entidá hasta'l 2002, en que lu nomaron vicepresidente y conseyeru delegáu de Banco Santander.

El conseyu d'alministración del Santander espresó la so "reconocencia y agradecimientu al estraordinariu llabor realizao por Alfredo Sáenz dende la so incorporación al grupu y, especialmente, como conseyeru delegáu de Banco Santander".

Santander destaca que nel periodu nel qu'Alfredo Sáenz desempeñó les sos funciones como conseyeru delegáu del bancu, el Grupu casi cuadriplicó'l so tamañu, pasando d'unos activos de 358.138 millones d'euros nel 2001 a 1,25 billones d'euros nel 2012, y d'unos fondos xestionaos de 453.384 millones d'euros (2001) a 1,39 billones d'euros (2012), consolidándose, amás, como primer bancu de la zona euru por capitalización bursátil.

La renuncia de Sáenz produzse, poro, primero que'l Bancu d'España comunique si'l directivu, condenáu pol Tribunal Supremu pero indultáu pol Gobiernu socialista, podía siguir nel cargu, cuestión qu'analiza a la lluz de la nueva normativa sobre honorabilidá de los directivos bancarios.

Al zarru del exerciciu 2012, Alfredo Sáenz tenía reconocíos unos compromisos por pensión a lo llargo de los sos años na entidá por 88,1 millones d'euros.

Amás, el conseyu d'alministración del bancu acordó nomar vicepresidente segundu a Matías Rodríguez Inciarte, actual responsable de los riesgos del grupu y presidente de la comisión delegada de riesgos del bancu.

VILLAR MIR ENTRA NEL CONSEYU D'ALMINISTRACIÓN

Tamién acordó aceptar la renuncia de Manuel Soto Serrano como conseyeru, agradeciéndo-y la so contribución a los llabores del conseyu dende la so incorporación al mesmu en 1999, y designar por cooptación conseyeru independiente a Juan Miguel Villar Mir.

El conseyeru independiente Guillermo de la Devesa va sustituyir a Manuel Soto como presidente de la comisión d'auditoría y cumplimientu, y nomáronlu vicepresidente terceru del conseyu d'alministración. A lo último, acordó designar miembru de la comisión executiva del conseyu a Isabel Tocino.

MARÍN, UN HOME DE LA CASA

En cuanto al currículu del actual 'númberu dos' del bancu, Marín, nacíu en 1966, ye llicenciáu en Derechu y diplomáu n'Empresariales pola Universidá Pontificia de Comillas.

Incorporóse a l'Asesoría Xurídica Internacional del Santander en 1991, onde permaneció hasta 1995, añu nel qu'entró na Secretaría Técnica del presidente.

En 1999 nomáronlu director xeneral de Banco Santander de Negocios y nel 2001 conseyeru delegáu de Banif, cargu que desempeñó hasta'l 2007. Ente esi añu y el 2009 asumió la dirección xeneral de la división de Banca Privada Global, y nel 2009 incorporó tamién ente les sos competencies l'área de Xestión d'Activos. A esti momentu yera director xeneral de la división de Xestión d'Activos, Banca Privada Global y Seguros.

Baxo la so xestión, Banco Santander firmó aliances estratéxiques pal negociu de seguros con Zurich pa Llatinoamérica y Aegon n'España. Na actividá de fondos, dende Banif llanzó Allfunds, plataforma líder n'Europa en distribución de fondos de delles xestores ente inversores institucionales.