Los artistes del Ballet Nacional encaren dende güei les audiciones p'anovar los sos contratos

MADRID 5 Sep. (EUROPA PRESS) -

Baillarinos, músicos y cantaores del Ballet Nacional d'España (BNE) van encarar a partir d'esti llunes les audiciones convocaes pol Institutu Nacional d'Artes Escéniques y de la Música (INAEM) pa cubrir delles places pa les próximes tres temporaes.

Un voceru del INAEM esplicó a Europa Press qu'esti llunes formarán los tribunales pa evaluar a los baillarinos y va ser a partir del martes 6 de setiembre cuando entamen les pruebes, que traxeron polémica por cuenta de les quexes de los artistes.

Éstos consideren esta convocotaria "discriminatoria" al respeutive de la Compañía Nacional de Danza (CND), na que nel so cuerpu artísticu nun hai que pasar esti procesu --y yá suscribió un nuevu contratu por dos años--, según esplicaron el pasáu mes de xunetu, cuando se dieron a conocer estes audiciones.

El procesu selectivu convocáu ye pa cubrir places nes temporaes 2016/2017, 2017/2018 y 2018/2019, de manera que les persones que superen dicha audición van roblar un contratu con duración hasta'l 31 d'agostu de 2017 y prorrogable hasta'l 31 d'agostu de 2019 por aciu de "superación d'audición interna".

Según recordaben los artistes nun comunicáu, el BNE y la CND siempre tuvieron "idéntica contratación" ya "idéntiques audiciones públiques" dende la so constitución, polo que ven esta decisión como una discriminación al respeutive de los sos compañeros, pero tamién como una represalia por protagonizar unos paros que cuntaron col sofitu de la totalidá de la plantiya.

Amás, los artistes del BNE criticaron qu'esto supón una represalia por entamar una fuelga. El pasáu mes de xunu, suspendieron delles actuaciones previstes, ente elles l'estrenu del homenaxe a Antonio Ruiz Soler, pa protestar pola so situación llaboral.

Nesti sen, tres la convocatoria d'audiciones, solliñaron que l'INAEM non solo refugó les sos "xustes reivindicaciones", sinón que comunicó'l "despidu" a la práctica totalidá de la plantiya con efectos del 31 d'agostu de 2016, "fecha d'espiración del últimu contratu supuestamente temporal".

LOS CONTRATOS INDEFINÍOS, "INVIDABLES"

Tal como recordaron, quieren la reconocencia" del INAEM, dempués de "siete sentencies firmes dictaes pol Tribunal Cimeru de Xusticia de Madrid nos años 2013 y 2014, qu'afectaben a ocho compañeros nuesos, y que, calificando la naturaleza xurídica de los nuesos contratos concluyeron que nun yeren temporales".

Fuentes del INAEM esplicaron a Europa Press que, como repitieron n'anteriores ocasiones, camudar los contratos a la modalidá d'indefiníos ye "invidable" y que esti contratu de tres años apurre "daqué más d'estabilidá".

Amás, y al respeutive de les crítiques sobre'l procesu d'audición p'anovar el contratu, estes fontes insistieron en que se trataba d'un pasu que "nun se pue evitar", porque ye "prerrogativa llegal" pa optar a estos puestos públicos. De la mesma, negaron que se trate d'un despidu, sinón que los contratos finen el 31 d'agostu.