Asturies pon en marcha la Llei de Ciencia cola creación d'un rexistru I+D+i y l'Observatoriu de la Innovación

   UVIÉU, 23 Abr. (EUROPA PRESS) -

   Más d'un centenar de representantes de centros d'I+D+i, grupos, institutos d'investigación, empreses, instituciones, axentes sociales y representantes políticos diéronse cita esti miércoles en Siero coles mires d'avanzar na puesta en marcha de la Llei de Ciencia qu'entró a valir el pasáu 12 d'abril. La creación d'un rexistru coles entidaes que formen parte del ecosistema científico y tecnolóxico asturianu y la constitución del Observatoriu de la Innovación van ser los primeros pasos na implantación de la norma.

   El conseyeru de Ciencia, Industria y Empléu, Borja Sánchez, presentó les principales novedaes d'una llei que califica de "tresformadora" y que, según él, "va marcar el futuru Asturies y redefine el marcu llegal del Sistema Asturianu de Ciencia, Tecnoloxía ya Innovación (SACI)".

   La nueva lexislación plantega la medría del financiamientu, el refuerzu de la collaboración ente'l sector públicu y l'iniciativa privada, la carrera investigadora como eje p'atraer talentu y el sofitu a la I+D+i d'excelencia.

   Sánchez recordó que la norma blinda'l financiamientu de la I+D+i asturiana pa los próximos años y alza de cinco a siete años la vixencia de los programes d'ayudes y atracción de talentu, pa converxer con Europa y afitar la crecedera del sistema científicu-tecnolóxicu rexonal.

   L'oxetivu ye amontar pasu ente pasu la inversión n'investigación ya innovación pa llegar a los 1.075 millones añales en 2030, tanto d'inversión pública como privada, lo que supondría'l 3% del PIB rexonal.

   REXISTRU PA INTEGRAR Y COORDINAR EL SISTEMA I+D+i

   Unu de los primeros pasos va ser la creación d'un rexistru pa integrar y coordinar el sistema d'I+D+i. El Rexistru del Sistema Asturianu de Ciencia, Tecnoloxía ya Innovación (Resaci) va funcionar como ferramienta d'identificación, coordinación y siguimientu de tolos axentes públicos y privaos que formen parte del sistema.

   Tar inscritu nesi rexistru va ser requisitu necesariu p'aportar a les distintes iniciatives de financiamientu, reconocencia y collaboración impulsaes pola Alministración autonómica.

   Amás, el rexistru va facilitar una meyor planificación estratéxica, con datos consolidaos sobro capacidaes, infraestructures, talentu investigador y llínees de trabayu nel territoriu. L'oxetivu ye que pueda ponese en marcha anguaño.

OBSERVATORIU D'INNOVACIÓN

   Otra de les grandes apuestes de la llei ye l'Observatoriu Asturianu de la Innovación, un órganu técnicu que va sirvir como ferramienta d'información y evaluación del ecosistema científicu y tecnolóxicu. La so misión va ser arrexuntar, analizar y espublizar datos sobro'l desenvolvimientu de la ciencia y l'innovación n'Asturies, incluyíos indicadores d'igualdá de xéneru, torna de la inversión pública y participación en programes nacionales ya internacionales.

   L'observatoriu tamién va ellaborar informes estratéxicos y va sirvir pa unificar fontes de datos y disponer d'información actualizada y acreditada que dexe empobinar les polítiques d'I+D+i. Ciencia trabaya, de la mano de la Fundación pal Fomentu n'Asturies de la Investigación Científica y la Tecnoloxía (Ficyt), na puesta en marcha d'esti órganu.

   La nueva norma incorpora tamién el conceutu de 'entornos de pruebes controlaes de tecnoloxía o sandbox', que van dexar a empreses, startups, universidaes o centros tecnolóxicos testar productos, servicios o modelos innovadores nun marcu regulau y supervisau.

   Esta ferramienta busca acelerar la tresferencia de conocencia dende l'ámbitu científicu al texíu productivu y favorecer la collaboración públicu-privada. Una de les primeres acciones nesti marcu va ser analizar los sectores y ámbitos nos que pueden ponese en marcha esti tipu de redolaes de pruebes. Un exemplu de 'sandbox' pue ser la tecnoloxía dual del sector de defensa o la industria aeroespacial, na qu'Asturies pretende asitiase.

TALENTU, IGUALDÁ Y CIENCIA ABIERTA

   La llei tamién incorpora midíes específiques pa la retención y atracción de talentu investigador, el fomentu de la igualdá efectiva ente muyeres y homes nel ámbitu científicu-tecnolóxicu, y l'impulsu de la ciencia abierta como principiu tresversal.

   Nesta llínea, reconoz el papel fundamental d'universidaes, centros tecnolóxicos y empreses como motores del cambéu, y favorez la participación de la sociedá civil nos procesos d'innovación.

   Unu de los puntos clave de la nueva llei ye la creación d'un Cuerpu Cimeru d'Investigación, siguiendo'l modelu del CSIC, de forma que'l Principáu pueda cuntar con personal investigador dientro de l'Alministración autonómica. La llei inclúi trés escales: profesor/profesora d'investigación, investigador/a y científicu/a titular.