Berta Piñán gana por unanimidá'l Premiu Nacional de Lliteratura Asturiana

   UVIÉU, 22 Ene. (EUROPA PRESS) -

   L'Academia de la Llingua Asturiana anunció esti xueves que la escritora Berta Piñán Suárez, ye la ganadora, por unanimidá, del Premiu Nacional de Lliteratura Asturiana "pola calidá d'un facer lliterariu que percuerre'l panorama asturianu de los caberos cuarenta años y nel que destaca la fondura d'una poesía sentida, sensible, abierta a los problemes cotidianos y del mundu".

   Nun comunicáu de prensa, l'ALLA destacó tamién la "bayurosa orixinalidá" de Piñán y "la coherencia d'una espresión narrativa na que l'apegu al territoriu y el tratamientu de tipos humanos cercanos dexa, xustamente, la posibilidá de la so interpretación universalista".

   "La contribución de la obra lliteraria de Berta Piñán a la dignificación de la lliteratura asturiana, del so espardimientu fuera de les llendes d'Asturies y, a lo cabero, la so grandísima y decisiva importancia nel procesu de recuperación llingüística n'Asturies, afiten el sentir del xuráu a la hora de conceder el Premiu Nacional", diz l'Alla.

   El Premiu Nacional de Lliteratura, amás del correspondiente medayón conmemorativu y la edición d'un llibru de síntesis de la so obra, cuenta con una dotación económica de 6.000 euros. Siguiendo'l vezu de les dos primeres ediciones, Berta Piñán Suárez recibirá públicamente'l so gallardón dientro de los actos del Día de les Lletres Asturianes, previstos pa la tarde del 8 de mayu del 2026, nel Teatru Campoamor.