Capriles desconvoca la manifestación en Caraques "pa evitar la violencia"

REUTERS

CARAQUES, 17 d'Abril (EUROPA PRESS)

El candidatu de la Mesa d'Unidá Democrática (MUD) a les elecciones presidenciales que se celebraron el pasáu domingu en Venezuela, Henrique Capriles, desconvocó la manifestación prevista pa esti miércoles en Caraques pa evitar la violencia.

"Mañana nun mos vamos movilizar. Pído-yos a tolos mios siguidores que se recueyan", dixo, nuna rueda prensa, dempués de que'l presidente electu, Nicolás Maduro, anunciara que nun va permitir que se celebre la manifestación capitalina.

Capriles esplicó que tien "información d'Intelixencia" según la que "el Gobiernu va a infiltrar persones na movilización". "El que salga ta del llau de la violencia, ta faciéndo-y el xuegu al Gobiernu", alvirtió.

Sicasí, repitió'l so llamáu a siguir coles cacerolaes diaries a les 20.00 hores (2.30 hores n'España) "para drenar tol malestar" coles potes y "non colos hermanos". "Porque nós somos pacifistes", sorrayó.

El candidatu opositor esclaró que les persones que protagonizaron los actos violentos que tuvieron llugar dende les elecciones presidenciales tán al marxe del so proyectu políticu. "Que la nuesa protesta seya firme nun significa que seya violenta", dixo.

Asina, Capriles acusó al oficialismu de tar detrás de los disturbios postelectorales "pa qu'equí nun se fale de lo que se ta esixendo". "El Gobiernu quier violencia. Yo yá conozo'l so llibretu", apuntó.

Por ello, pidió al presidente electu "que se calme un poquiñín", recordándo-y --según reveló, al traviés d'una conversación telefónica-- que "el que ta en (el Palaciu de) Miraflores ye'l que tien que garantizar la paz nel país".

Nesti contestu, pidió a los sos siguidores que confíen nel so lideralgu pa conducir "la crisis qu'hai en Venezuela". "Tien qu'haber disciplina porque hai persones deseoses de qu'esto pase a un escenariu de violencia. Nós siempres pidimos paz", insistió.

AUDITORÍA ELECTORAL

Per otru llau, repitió la so solicitú de que'l Conseyu Nacional Electoral (CNE) cuente otra vez el cien per cien de los votos emitíos el pasáu domingu pa confirmar los resultaos electorales. "Nos países onde hai democracia, ye normal auditar", indicó.

"Si usté canta bingu, usté tien que mostrar el cartón pa dicir que ganó. Usté ve l'actitú d'esa persona y ési nun ye'l discursu d'una persona que ganó", consideró, analizando la cadena nacional que Maduro dio esti martes.

Amás, sorrayó que, independientemente de quién ganara, el Gobiernu nun supo interpretar el resultáu electoral. "Equí nun hai una mayoría, hai dos metaes. "De lo que se trata ye qu'ente les dos metaes haya un diálogu y el país salga alantre", señaló.

Capriles reveló que mientres la xornada electoral produxéronse numberoses irregularidaes ente les que mentó 600.000 votantes muertos, 535 máquines de votación estropiaes y 283 centros de votación nos que los testigos electorales retiráronse a la fuerza, hasta a punta de pistola.

"Hai 1.176 centros de votación onde'l candidatu Maduro sacó más votos que'l presidente Chávez. ¿Quién pue creer que n'algún centru de votación Maduro sacó más votos que Chávez?", añadió, según informa la cadena Globovisión.