Capsa inaugura la factoría llechera de Zarzalejo (Madrid) tres invertir 50 millones

MADRID/UVIÉU, 27 de Payares (EUROPA PRESS)

Corporación Alimentaria Peñasanta (Capsa), fabricante de la marca Central Llechera Asturiana, inauguró güei la factoría llechera de Zarzalejo (Madrid), una planta que mercó al añu pasáu a la empresa La Serrana Campo Leite, instalaciones nes qu'executó una fondera remodelación, con una inversión final de 50 millones d'euros.

Con una superficie de 46.000 metros cuadraos, de los que 7.200 representen la superficie construyida, trátase d'una de les plantes llecheres más mondernes del sector, según informó la compañía, que destacó que nesti momentu tien una plantiya de 35 emplegaos, anque próximamente algamará los 60 trabayadores.

La factoría de Zarzalejo, que cuenta con cuatro llinies d'envasáu, dispón d'una capacidá de procesáu de 30.000 llitros de lleche UHT por hora y una capacidá de pasteurización de 66.000 llitros de lleche por hora.

Cola puesta en marcha d'esti centru, Capsa yá dispón de planes industriales en cinco comunidaes autónomes (Asturies, Galicia, Cataluña, Baleares y Madrid).

Esta factoría forma parte de la estratexa de crecimientu de la compañía nel mercáu nacional. Capsa sorrayó que se posiciona como la empresa cabezalera del mercáu llecheru espñaol, con una cuota de ventes del 15,34% perdelantre de Puleva (8,5%) y Pascual (8,1%), mientres que les marques blanques disponen d'una penetración del 52,1%.

Con una facturación de 851 millones d'euros nel 2008, la compañía cuenta con más de 1.400 trabayadores y recueye cerca de 9.000 millones de llitros al añu a los sos ganaderos abastecedores.

MARCA MADRID ESCELENTE

La presidenta de la Comunidá de Madrid, Esperanza Aguirre, asistió al actu inaugural, onde entregó al conseyeru delegáu de Capsa, Pedro Astals, la llicencia d'usu de la marca Madrid Escelente.

Trátase del sellu de garantía otorgáu pol Gobiernu rexonal a les empreses que destaquen pola so calidá y la escelencia na so xestión, dempués de superar un rigurosu procesu nel que s'analicen aspectos como la innovación y meyora continua, la satisfaición de los clientes, la responsabilidá social o la so rellación colos clientes, proveedores y la sociedá nel so conxuntu.