CCOO denuncia'l bloquéu de práctiques de FP p'alumnos migrantes por falta de Seguridá Social

   UVIÉU, 21 Abr. (EUROPA PRESS) -

   El Sindicatu d'Enseñanza de CCOO d'Asturies denunció esti martes la situación de bloquéu que sufren numberosos estudiantes migrantes de Formación Profesional que, al nun disponer de númberu de la Seguridá Social, nun puen realizar les práctiques obligatories de los sos ciclos formativos.

   Destaca'l sindiatu qu'esta circunstancia, conocida dende va meses, ta dexando al alumnáu nuna situación de vulnerabilidá estrema y comprometiendo'l so derechu a la educación y a la titulación.

   Nesti sentíu recuerda la organización que yá solicitó fái más d'un mes una xunta a la Delegación del Gobiernu en Asturisa pa tratar esta cuestión y buscar una solución urxente, ensin recibir contestación de nengún tipu per parte de Delegación de Gobiernu. Énte esta situación de bloquéu, caltúvose una xunta col Director Xeneral de FP.

   Mientres dichu alcuentru, CCOO solicitó que s'articularen tolos mecanismos pa poder arreglar esta problemática y propunxo una midida temporal y escepcional pa evitar que l'alumnáu afectáu pierda un cursu completu que pasaría per dexar que les práctiques se realicen nos mesmos centros educativos, siguiendo'l precedente establecíu mientres l'andanciu de COVID-19.

   Según considera CCOO esta alternativa dexaría garantizar la continuidá formativa mientres se resuelve la situación alministrativa.

   Sicasí, a día de güei, nun esiste nenguna instrucción oficial, nin pal presente cursu nin pal próximu y el profesoráu y los tutores de FP atópense ensin directrices que treslladar al alumnáu, xenerando un clima d'incertidume qu'afecta especialmente a los que yá s'atopen nuna posición de mayor vulnerabilidá.

   Amás esta situación treslládase al profesoráu de la ESO y Bachilleratu, que nun saben si empobinar a alumnáu migrante ensin númberu de la Seguridá Social a la FP.

   Dende'l Sindicatu d'Enseñanza de CCOO de Asturies esiximos respuestes urxentes y soluciones que prioricen al alumnáu, garantizando que nengún estudiante quede atrás por motivos alministrativos ayenos a la so voluntá, volviendo repitir la solicitú de xunta urxente cola Delegada del Gobiernu n'Asturies, conclúi CCOO.