El circuitu 'Autores nel Camín' principia esti trimestre 12 alcuentros con creadores asturianos en siete conceyos

UVIÉU 5 Oct. (EUROPA PRESS) -

El circuitu 'Autores nel Camín' del programa 'Asturies, Cultura en Rede' llega esti trimestre a siete conceyos asturianos, onde van facese un total de 12 alcuentros con creadores y artistes asturianos gallardonaos nel 2022 colos premios lliterarios y escénicos convocaos o promovíos pola Viceconseyería de Cultura, Política Llingüística y Deporte.

El cuartetu de folk Algaire, que llevó nel 2022 el Premiu Camaretá al meyor cantar col tema Coral y maera, va visitar el Teatru de La Lechera de Cancienes (Corvera) el 8 d'ochobre. Amás, el grupu integráu por Iratxe Espina, Carla Miranda, Loreto Suárez y Juan Yagüe tamién va tar na Casa la Cultura de Tinéu'l vienres 13 d'ochobre.

El miércoles 18 d'ochobre, la Biblioteca Gonzalo Anes d'Ortigueira, en Cuaña, va recibir la visita d'Inés Fernández, Premiu Quiastolita de Lliteratura Infantil y Xuvenil en gallego-asturiano cola obra 'Bolo'. La escritora tapiega va participar, amás, el 24 de payares nun alcuentru col públicu que va facese na Casa la Cultura de Bual.

Nel 2022, el Premiu Alfonso Iglesias de Cómic n'asturianu llevólu Guillermo Menéndez, pola so obra 'Ana María. La Llobera d'Asturies'. Esti trimestre, Menéndez va participar en dos alcuentros, ún el día 19 d'ochobre, nel Centru Sociocultural Les Vegues (Corvera), y otru el 13 d'avientu, nel Atenéu de Villaviciosa.

Amás, Gonzalo G. Barreñada, premiu Xosefa Xovellanos de novela n'asturianu con 'El viaxe del cacique', va mantener alcuentros col públicu en Candamu (2 de payares nel Palaciu Valdés Bazán en San Román), en Villaviciosa (22 de payares na Casa de los Hevia) y en Corvera (21 d'avientu nel Centru Sociocultural de Les Vegues).

María del Carmen Siñeriz, ganadora del Premiu Ría del Eo de Poesía en gallego-asturiano con 'Pigureira de palabras esqueicidas', va acudir el 10 de payares a la Casa la Cultura de Bual, y Marta Mori, gallardonada col premiu Xuan María Acebal de poesía n'asturianu con 'Los carreros del tiempu', va tar el mesmu día na Sala Loreto de Colunga.

Per otru llau, Damián Barreiro, que nel 2022 llevó'l Premiu Máximo Fuertes Acevedo d'Ensayu n'asturianu con 'Asturianía kitsch: decálogu de la cultura pop astur', va mantener un alcuentru en payares nel Atenéu de Villaviciosa.