UVIÉU, 28 Feb. (EUROPA PRESS) -
Un 66,6% los habitantes mayores de 16 años d'Uviéu, Xixón y Avilés declárase falantes d'asturianu, de los que cuasi la metá muestra capacidá llectora (16,4%) o d'escritura (13,2%). Énte ellos, un 29% diz entendelo, pero nun lo fala, y otru 4,4% nin lo fala nin lo entiende.
Tanto los niveles de conocimientu, como d'alfabetización y normalización, avancen en función de la escolarización, que ye lo qu'espresa facer cuasi ún de cada cinco (18,2%) de la población metropolitana mayor de 16 años.
Asina se recueye nuna encuesta sociollingüística con 500 entrevistes realizaes pola Academia de la Llingua Asturiana (ALLA) y con un avance de resultaos que presentó esti martes el catedráticu de Socioloxía y autor del informe, Francisco Llera Ramo, y el presidente de l'ALLA, Xosé Antón González Riaño.
L'estudiu muestra que la metá de la población metropolitana asturiana mayor de 16 años se dixebra cuasi en partes iguales ente los que reflexen un nivel altu (22,6%) y aceptable (26,8%) de conocimientu llingüísticu n'asturianu.
La otra metá dixébrase ente los que tienen un comportamientu predominantemente diglósicu (31,2%) y los que muestren un conocimientu nulu o deficiente del asturianu (19,4%). Según el documentu, Avilés encabeza los niveles de maña llingüística, siguíu d'Uviéu, mentes que Xixón destaca por un porcentaxe mayor d'usu diglósicu.
Sobre'l futuru d'esti idioma, al 63,2% prestaría-y que los sos fíos conocieren la llingua asturiana y un 89,2% quier la so presencia nel sistema educativu. Per otru llau, un 89,4% comparte que l'asturianu forma parte del patrimoniu cultural d'Asturies y tien que tar al marxe d'ideoloxíes polítiques.
P'acabar, siete de cada diez quieren pal asturianu'l mesmu estatus que'l restu de llingües rexonales reconocíes n'España y un 95,8% comparte l'aspiración d'un futuru billingüe p'Asturies, yá sía d'una manera más intensiva (26%) o voluntaria (69,4%).
