La Conseyería destaca los ingresos que la pesca costera artesanal supón pa les rules asturianes

UVIÉU, 26 de Febreru (EUROPA PRESS)

El conseyeru de Mediu Rural y Pesca, Aurelio Martín, sorrayó la importancia de la pesca costera artesanal n'Asturies, "formada por unes 350 embarcaciones de les que más del 70 por cientu pertenecen al sector de la pesca costera artesanal, y del que proceden la mayor parte de los ingresos".

Mientres la so intervención na Xornada sobre la Xestión Sostenible de la Pesca Artesanal que se celebra güei nel Acuariu de Xixón, el titular de Mediu Rural llamentó que la pesca costera artesanal fuera históricamente la gran inorada pola Política Pesquera Común, a pesar de ser mayoritaria y representar un pesu importante a nivel social, económicu, ecolóxicu y cultural nun bon númberu de comunidaes costeres.

Al respeuto de la relevancia económica d'esti subsector nel Principáu, indicó que quitando nes dos grandes rulas asturianes, Avilés y Xixón, onde'l porcentaxe ye algo más baxu, pero tamién importante, "nel restu'l mayor porcentaxe d'ingresos provién precisamente de les ventes de les captures d'esti sector de flota".

Sicasí, Martín añadió qu'afortunadamente "esa actitú ta cambiando y el Llibru Verde pa la Reforma de la Política Pesquera Común plantega una serie d'entrugues sobre la pesca artesanal, coles mires d'abrir l'alderique sobre la so importancia económica y social, sobre los mecanismos pa establecer un réxime de xestión estremáu y sobre les midíes pa protexer el modelu".

La Xornada enmárcase dientro del Proyectu de Desarrollu Sostenible de les pesquerías artesanales del Arcu Atlánticu PRESPO y ta entamada conxuntamente pol Centru d'Esperimentación Pesquera de la Dirección Xeneral de Pesca del Principáu y la Facultá de Bioloxía de la Universidá d'Uviéu. A la mesma asisten cerca d'un cientu d'espertos, técnicos y representantes del sector pesqueru procedentes d'Asturies, Galicia, Chile, Portugal, Francia.