Convocada la V Beca Residencia Asturies pa escritores n'asturianu o eonaviegu: un mes de creación lliteraria n'A Coruña

   UVIÉU, 29 Jul. (EUROPA PRESS) -

   La Residencia Lliteraria 1863, en collaboración cola Conseyería de Cultura, Política Llingüística y Deporte, anuncia la convocatoria de la V Beca Residencia Asturies, una iniciativa que reafita'l compromisu institucional cola creación lliteraria nes llingües propies del territoriu asturianu.

   La beca ufierta una estancia d'un mes na ciudá d'A Coruña, del 1 al 31 d'avientu del 2025, nuna redolada histórica y cultural privilexáda. Esta beca inclúi agospiamientu na Residencia 1863; tresporte dende cualquier puntu d'Asturies y una dotación de 800 euros pa gastos de mantención.

   Gracies al sofitu de la Conseyería de Cultura, esta beca consolídase como una ferramienta pa fomentar la excelencia artística, la diversidá llingüística y el desenvolvimientu creativu d'autores qu'escriben n'asturianu o eonaviegu.

   La convocatoria va tar abierta hasta'l 31 d'agostu del 2025 a les 22.00 hores. Van poder participar escritores mayores de 18 años que cunten con siquier una obra publicada.

   El proyectu lliterariu presentáu tien de ser orixinal y inéditu, y va ser evaluáu por un comité d'espertos de reconocíu prestíu nel ámbitu cultural asturianu.

   Nes anteriores convocatories recibieron esta beca Miguel Rodríguez Monteavaro (2021), Pablo X. Suárez (2022), Milio Ureta (2023) y Patricia Suárez (2024). Pa más detalles o pa unviar la so solicitú, pue contactar al traviés del corréu electrónicu: 1863coruna@gmail.com